Misskildir sjálfstæðismenn
Sjálfstæðismenn njóta ekki sannmælis í umhverfismálum að mati Steinsmugunnar. Undir hrjúfu yfirborði kapítalismans slær milt hjarta sem finnur til með móður jörð. Þannig sá Davíð ákaflega mikið eftir trjánum sem fór í að prenta endurreisnarskýrslu flokksins og gerði það að umtalsefni á landsfundi.
Arftaki hans á formannsstóli sagði líka á þingi í dag að það væri glapræði að henda vatnalögunum frá 2006 í ruslafötuna. Sjálfsagt líka út af trjánum
Sjálfstæðismenn eru líka sannir jafnaðarmenn en þeir njóta ekki sannmælis í því frekar en öðru. Þannig tóku þeir út orðið einstaklingsfrelsi úr stjórnmálaályktun flokksins á flokksráðsfundi í Stapa í apríl.
Þar stóð áður:
Að vinna í innanlandsmálum að víðsýnni og þjóðlegri umbótastefnu á grundvelli einstaklingsfrelsis og atvinnufrelsis með hagsmuni allra stétta fyrir augum. „
Nú stendur:
„Grunnstef Sjálfstæðisflokksins byggist á víðsýnni umbótastefnu á grundvelli jafnréttis og atvinnufrelsis með hagsmuni allra stétta að leiðarljósi.“
Steinsmugan velti fyrir sér í hverju jafnaðarmennska Sjálfstæðisflokksins væri fólgin? Og hún komst að þeirri niðurstöðu að í kjölfar útkomu Rannsóknarskýrslu Alþingis hefði flokknum þótt við hæfi að allir tækju jafna ábyrgð á bankahruninu óháð því sem á undan væri gengið.
Slík jafnaðarmennska gerir í raun allar frekari rannsóknir óþarfar og er því fjarskalega umhverfisvæn í sjálfu sé.
Ekki síst með tilliti til trjánna.
Skrifa athugasemd