Við erum svo sérstök

7.6.2010 9:10 Steinsmugan

Auglýsingar og markaðsmál eru merkilegt fyrirbæri og Steinsmugan verður að játa að stundum hitta auglýsingar í mark án þess að boðskapurinn blasi við vegna þess að undirmeðvitundin sér um að geta í eyðurnar..

Sjöhundruð milljónir fara í auglýsingaátak til að sefa reiði og ótta útlendinga eftir að við sendum þeim öskuský með aðstoð úr neðra. Núna gefa illkvittnir markaðsmenn í skyn að auglýsingaátakið sem er myndband af hressum og kátum Íslendingum að hoppa við frumskógartónlist á hinum og þessum stöðum sé ekkert annað ruslpóstur og í versta falli geti borist í hann tölvuvírus.

Flugleiðir eru með auglýsingaherferð um borð í vélunum sem gengur meðal annars út á að þótt náttúra Íslands sé stórbrotin, landslagið engu líkt og fegurðin ólýsanleg sé það nú samt sem áður merkilegast við Ísland, hvað við séum lítil og skrítin, til dæmis sé forsætisráðherrann í símaskránni og meirihlutinn trúi á álfa.

Eitt af sérkennum Íslands og Íslendinga er samt innihaldið í sjálfum auglýsingunum, þetta barnalega og heimóttarlega mont og skrum, þessi löngun til að vera krútt, þessi bjargfasta trú á að við séum svo sérstök að umheimurinn hljóti að falla í stafi.

Ísland er í samfélagi þjóðanna eins og krakki sem öllum finnst ofsalega skemmtilegur og sjarmerandi þar til hann hefur upp raust sína og fer að útlista hvað hann er skemmtilegur og sjarmerandi, Þá langar mann í versta falli til að rassskella krakkann en í besta falli til að troða puttunum í eyrun.

Auglýsingu Flugleiða er beint til útlendinga en undirmeðvitund Steinsmugunnar réði engu að síður dulmál hennar eins og hún hljómar í eyrum Íslendinga.

Íslensk náttúra er stórbrotin, fegurðin engu lík og landslagið ólýsanlegt. Samt sem áður er það merkilegast við Ísland að Íslendingum er alveg sama og þeir eru til í að selja þetta allt hæstbjóðanda. Meirihlutinn er afar fégjarn og auðtrúa. Þeir sem vilja kaupa geta hringt í forsætisráðherrann, hann er í símaskránni.

Senda grein