Skötuselsfrumvarpið var tekið af dagskrá Alþingis að kröfu Sjálfstæðismanna í dag. Samtök atvinnulífsins hóta að segja upp stöðugleikasáttmálanum ef frumvarpið verður samþykkt. Frumvarpið fór aftur á dagskrá að kröfu stjórnarþingmanna. Atli Gíslason formaður sjávarútvegsnefndar Alþingis á ekki von á öðru en að greidd verði atkvæði um frumvarpið í dag. Standi atvinnurekendur við hótanir sínar er stöðugleikasáttmálinn fyrir bí.

Björgvin G. Sigurðsson, þngflokksformaður Samfylkingarinnar hefur komið talsvert að  E.C.A. Program sem vill stofna einkaherstöð  á Íslandi. Hann sagðist í gærkvöld binda miklar vonir við þetta risastóra verkefni. Hann segir öll leyfi liggja fyrir en aðstoðarmaður Samgönguráðherra segir hinsvegar ekki hægt að taka pólitíska ákvörðun fyrr en Flugmálastjórn og fleiri hafi skoðað málið.

Norska ríkisstjórnin útilokar ekki viðbótarlán til Íslands, jafnvel þótt enginn Icesave-samningur liggi fyrir. Þetta kemur fram í nýju viðtali Aftenposten við Jonas Gahr Störe, utanríkisráðherra Noregs. Áður hafði ráðherrann brugðist illa við gagnrýni forseta Íslands, sem telur Norðurlönd hafa svikið Íslendinga.

Sigmundur Davíð Gunnlaugsson formaður Framsóknarflokksins segir óheppilegt að viðhalda óvissu um þjóðaratkvæðagreiðsluna um Icesave.  Slíkt geti verið túlkað sem veikleikamerki að hálfu viðsemjenda.  Forsætisráðherra segir atkvæðagreiðsluna tilgangslausa.