Með eða á móti ESB
Þeir sem tala fyrir inngöngu okkar í ESB nefna það gjarnan að lýðræði,friður og mannréttindi einkenni þau samtök. En þá mætti spyrja á móti: Lýðræði, friður og mannréttindi fyrir hvern?
Um miðjan tíunda áratuginn lenti ég á flugvellinum í Glasgow á leið til Edinborgar. Þar var eðlilega farið í gegnum vegabréfaeftirlitið. Þar var mönnum skipt í tvo hópa. Þjóðir sem voru í ESB og „Aðrar þjóðir“. ESB hópurinn rann í gegn, en við hin (Ísland var þá enn flokkað undir aðrar þjóðir) stóðum í langri biðröð. Á undan mér í röðinni voru þrjú ungmenni frá Íslandi, velklædd og yfirlætisleg og töluðu hástöfum um þá niðurlægingu að vera skipað á bekk með þessu liði sem var skilgreint sem „aðrar þjóðir“ . Fannst auðheyranlega að þau ættu heima á Saga class. Alltaf þegar menn fara tala um mannréttindi og ESB í sama orði þá man ég eftir þessum börnum sem ekki vildu tilheyra stærstum hluta heimsins heldur klúbbi útvaldra.
Athugasemdir (11)
-
Helgi Jóhann Hauksson skrifar:
ESB er fremst allra samfélaga veraldar, jafnt innan Evrópu sem utan, þegar kemur að baráttu fyrir umhverfisvernd, mannréttindum, neytendavernd, rétti launafólks og grunni að félagslegu réttlæti. Alveg sama hvað menn finna að enn er ógert þá er ekkert samfélag manna með tærnar þar sem ESB er með hælana í þessum efnum - og stendur oft eitt vaktina t.d. um erfðabreyttar lífverur sem má t.d. lesa um hér: http://www.responsibletechnology.org/GMFree/Home/index.cfm
-
Helgi Jóhann Hauksson skrifar:
OK, loksins 9 árum seinna lögleiddi Ísland efni tilskipunar ESB um erfðabreyttar lífverur (sbr hér: http://www.natturan.is/frettir/5687/ )
- og svo eru þeir sem kenna sig við grænt hér á landi að setja sig á upp á móti ESB, - svei þeim.
Sjá meira um erfðabreytt t.d. hér:
http://www.responsibletechnology.org/GMFree/Home/index.cfm -
Pétur Örn Björnsson skrifar:
Sæl María
Set hér inn komment í svipuðum dúr og svipuðu molli og ég hef skrifað til þíns góða bloggs á eyjunni.
Þó milljarðaspurningunni sé svarað ... þá snýst málið ... hvað okkur varðar hér innanlands ... um okkar eigin dug og hreingerningu ... hér innanlands.
Þorum við eða þorum við ekki að deila öllum nytjum og gæðum lands okkar og sjávar á til hagsbóta fyrir allan ... ég segi ALLAN ... almenning þessa lands. Við eigum sjálf að hafa dug til þess og til þess þarf að bylta því kerfi sem er hér á landi. Þorum við að taka slaginn hér innanlands við sægreifa og álfursta og illfygli? Einungis nytsamir sakleysingjar eða hagsmunatengdir aðilar halda því fram að það muni ESB gera fyrir okkur.
Munum að þjóðin á að ráða sínum málum, en ekki sægreifar, álfurstar, stálkóngar, kolapungar og hrægammar og aragrúi af illfyglum.
Nú en ef við erum svo miklir vesalingar að við treystum okkur ekki til þess að umbylta kerfinu, nú þá verðum við sjálfsagt að fara eins og hundar með skottið á milli lappanna og leita á náðir allra sægreifa, álfursta, stálkónga, kolapunga, hrægamma og aragrúa af illfyglum heims-kapítalismans.
En munum þá, að sægreifar, álfurstar og illfygli verða þá enn hér og enn fastari í sessi en fyrr. Aðallinn stendur alltaf saman gegn almenningi allra landa ... meðan það passar aðlinum. Þeim er skítsama um okkur ... okkur sauðsvartan almúgann. Þannig er mín sýn í löngu sögulegu ljósi.
Slömmin eru enn óbreytt, þó milljarðaspurningunni væri svarað ... í bíó. -
María Kristjánsdóttir skrifar:
Sæll Helgi Jóhann, ég var ekki í þetta sinn að ræða mannréttindi innan Evrópu heldur um ESB og hina í heiminum. Telja íbúar þess að sömu mannréttindi eigi að gilda innan ESB og utan? Er ESB forréttindaklúbbur fyrir ákveðin lönd og þjóðir? Þetta þarf að ræða. Arðrán fiskimiða í Afríku. Arðránið í þriðja heiminum. Afstöðu ESB til Palestínu. Stríðsrekstur þjóða innan ESB í Írak og Aganistan. Og svona mætti lengi telja. Við komumst skammt með því ýmist að lofsyngja ESB eða níða það niður. En við verðum að gera okkur nákvæma grein fyrir hvers konar bandalag þetta er.
-
Baldur skrifar:
María! Ég spyr enn og aftur. Hvaðan kemur þessi ískaldi ótti. ESB er með sameiginlegt landamæraeftirlit sem kemur mannréttindum ekkert við. Tek undir það sem Helgi Jóhann hefur sagt hér. Allt frumkvæði í okkar heimshluta í því hvað snertir réttindi fólks undanfarna áratugi hefur komið frá Evrópubandalaginu og Evrópuráðinu. BKv. Baldur
-
Pétur Örn Björnsson skrifar:
Heims-kapítalisminn \= stríðs-kapítalisminn.
Hreingerningu klíkanna heima.
Hreingerningu klíkanna í ESB.
Hreingerningu klíkanna út um alla heima.
Við getum sýnt gott fordæmi hér heima hvernig á að hreingera og umbylta óréttlæti og ósanngirni og komið á alvöru jafnrétti. Ef við, þessi litla þjóð getur það ekki ... heldur fólk þá í alvöru að Brussel geri það fyrir okkur?
Sem einfalt dæmi: Hvað með Grikkland? -
Pétur Örn Björnsson skrifar:
Það er alveg ljóst að embættismanna-aðallinn vill sameinast sér líkum. Það vilja líka áar fyrrum landshöfðingja, td. ritstjóri Fréttablaðsins.
Jörundur var þó skömminni skárri á sínum Hundadögum. -
Elín Sigurðardóttir skrifar:
Góð grein hjá þér María. Þetta er nákvæmlega málið.
-
María Kristjánsdóttir skrifar:
Besti Baldur, ég óttast ekki neitt nema þá óraunsæu,fögru mynd sem verið er að draga upp af kostunum við að ganga í ESB. Auk þess er ég ekki alveg viss um að ég sé Evrópubúi! En nú er ég að fara í leikhús, að sjá Rómeó og Júlíu, svo ég verð að rökstyðja það síðar.
-
Helgi Jóhann Hauksson skrifar:
Hvað ertu þá María ef þú ert ekki Evrópubúi? —Ekki ertu fremur Ameríkani en Evrópubúi er það?
Pétur Örn, það er mikill misskilningur hjá þér ef þú heldur að líklegra sé að þýðingamiklar breytingar og segjum byltingar verði fremur í smáum en stórum samfélögum. - Mundu t.d. að Besti flokkurinn komst til valda í Reykjavík en ekki í Súðavík eða á Selfossi, stórstígar framfarir hafa orðið á stöðu homma og lessbía á Íslandi og í Kaliforníu en ekki í Færeyjum, byltingar hefjast í höfuðborgum en ekki í sveitaþorpum, ... .
Það er ekkert við ESB-aðild sem takmarkar möguleika okkar til að bæta réttindi og stöðu launafólks, umhverfis, námsmanna, náttúru, neytenda eða listamanna hér á landi. Réttindi þessara aðila allra í ESB eru grunnréttindi sem öll ríkin mega tryggt betur og miklu betur ef þau vilja, aðeins að þegnum sé ekki mismunað. — Vart takmarkar sú krafa vinstri menn. -
Pétur Örn Björnsson skrifar:
Helgi, kannski er Stóra Búsó byrjuð að gerjast og mun blossa upp, já, haltu þér nú fast, á Austurvelli í höfuðborginni Reykjavík, þegar líða tekur að hausti.
Það þykir mörgum mjög líklegt, mas. ritstjóra Fréttablaðsins, sem röflar nú mjög um rafbyssur. Í röfli hans felst í leiðara létt hótun, enda Brussel-sinni.
Skrifa athugasemd