Landráð
Viðtal Evu Maríu við Pál Skúlason hefur verið til umfjöllunar í bloggheimum og hvatt marga til hugleiðinga. Páll talaði um að ríkið, sem hefur þá frumskyldu að gæta að almannaheill, hafi brugðist í haust. Ríkið, sameign okkar allra var orðið svo veikt að það megnaði ekki að fyrirbyggja hrunið. Aumt ástand ríkisins má rekja til upphafs einkavæðingarinnar en þá hófst hönnuð atburðarás sem markvisst gróf undan þjóðríkinu Íslandi.
Þessi atburðarás var hönnuð af stjórnmálaflokkum sem ráðið hafa ríkjum í 17 ár. Markvisst vorum við blekkt með alls kyns lofsöng um hina ósýnilegu hönd markaðsins, höndina sem rétta átti hlut allra og tryggja þjóðinni farsæld. Markvisst vorum við blekkt með ótrúlegum lofsöng um útrásartröllin. Markvisst vorum við blekkt með níði um skoðun og álit erlendra sérfræðinga. Svo markviss og einbeittur var áróðurinn að þegar loks kom að hruninu þá féll landið á einni viku. Leifturstríð skall á landinu og engin gat rönd við reist - engin og ekkert gat bjargað okkur. Engin furða að forsætisráðherra sagði í ávarpi sínu í byrjun október Guð hjálpi Íslandi.
Í lok viðtals Evu Maríu notaði Páll hugtakið landráð. Hann nefndi ekki hverjir væru landráðamenn en það má spyrja hvort stjórnmálaflokkarnir sem hér hafa ráðið ríkjum hafi með gáleysi sínu og markvissu niðurrifsstarfi á ríkinu framið Landráð, að vísu af gáleysi en Landráð engu að síður.
Það má því spyrja hvers vegna gjörðir manna hafi ekki verið rannsakaðar og hví enginn hafi verið handtekin því að í X. kafla Almennra hegningarlaga er tekið á brotum af þessu tagi. Hlutur auðmannanna, hinna svokölluðu útrásarvíkinga, er hugsanlega mestur. Aðgerðir þeirra bæði hér heima og erlendis, studdar dyggilega af íslenskum stjórnvöldum, voru færðar á ábyrgð þjóðarinnar. Eru það ekki landráð þegar það er gert af ráðnum hug? Einbeiting þeirra við að sanka að sér sem mestum auðæfum, með útþenslu bankanna og hrikalegum lántökum, hvað sem það kostaði er slík að á máli afbrotafræðinnar kallast það: einbeittur brotavilji.
Það er lögfræðinga að skera úr um það hvort að lög hafi verið brotin en allir landsmenn eru aðilar að málinu og því ekki úr vegi að hugleiða þýðingu hugtaksins landráð í atburðarrás haustsins. Landráð eru mjög alvarlegur glæpur og því þora menn kannski ekki að ræða atburðarrásina á þeim nótum. Allt frá því að bankarnir hrundu og þá sérstaklega þegar martröð “Icesave” reikninga Landsbankans og “Egde” reikninga KB-banka læsti krumlum sínum um þjóðina hafa verið uppi vangaveltur um hvort stofnun þessara reikninga sé ekki í raun og veru landráð. Landráð af stórkostlegu gáleysi enda afleiðingarnar hrikalegar fyrir land og þjóð. Var stofnun og rekstur þessara reikninga og sú bakábyrgð sem stofnað var til ekki landráð. Það verður ekki um það deilt að þetta gerist í umhverfi alþjóðlegrar fjármálakreppu sem hefur haft ófyrirséðar afleiðingar þ.á.m. hrun þessara reikninga eða öllu heldur innistæðuleysi þeirra.
Þegar reikningarnir voru stofnaðir var það gert af sérfróðum aðilum sem þekktu fjármála- og lagaumhverfi í Evrópu. Þekking þessara aðila gerir þá seka um ásetning. Þessir aðilar og ríkisstjórnin sem studdi þá settu velferð og efnahag þjóðarinnar í áhættu sem ekki verður réttlætt. Þeir héldu uppteknum hætti eftir að heimskreppan var skollin á en allir reikningar í Hollandi voru stofnaðir í sumar. Ríkisstjórnin, ráðandi hluthafar bankanna og bankastjórar spiluðu rússneska rúllettu með efnahag þjóðarinnar. Skoða þarf málið í þessu samhengi.
Skoðum aðeins kafla X. Landráð í almennum hegningarlögum, 88. gr., 91. gr. og 100. gr. En þar segir: 88. gr. Hver, sem opinberlega í ræðu eða riti mælir með því eða stuðlar að því, að erlent ríki byrji á fjandsamlegum tiltækjum við íslenska ríkið eða hlutist til um málefni þess, svo og hver sá, er veldur hættu á slíkri íhlutun með móðgunum, líkamsárásum, eignaspjöllum og öðrum athöfnum, sem líklegar eru til að valda slíkri hættu, skal sæta …1) fangelsi allt að 6 árum.
Hvað er verið að segja þarna? Jú, þarna er verið að segja að geri einhver eitthvað sem verður til þess að erlent ríki grípi til einhverra aðgerða eða ráðstafana sem skaða íslenska ríkið og eða hagsmuni þess hafi framið landráð. Bresk stjórnvöld gripu til hryðjuverkalaga gegn íslenskum hagsmunum vegna athafna íslenskra aðila á erlendri grund og ollu þar með eignaspjöllum og móðguðu þjóðina. Bretar fóru að hlutast til um málefni íslensku þjóðarinnar og það gerir einnig Alþjóðagjaldeyrissjóðurinn nú en það má rekja til hruns bankanna og gríðarlegrar skuldsetningar vegna þeirra. Þýðir þetta ekki að þeir sem stóðu að stofnun þessara reikninga komu af stað atburðarás sem hefur skaðað íslenska hagsmuni í nútíð og framtíð.
91gr. almennra hegningarlaga hljóðar svo: 91. gr. Hver, sem kunngerir, skýrir frá eða lætur á annan hátt uppi við óviðkomandi menn leynilega samninga, ráðagerðir eða ályktanir ríkisins um málefni, sem heill þess eða réttindi gagnvart öðrum ríkjum eru undir komin, eða hafa mikilvæga fjárhagsþýðingu eða viðskipta fyrir íslensku þjóðina gagnvart útlöndum, skal sæta fangelsi allt að 16 árum.
Hér segir að láti menn uppi eða skýri frá samningum og slíku er ríkið komi beint að hafi framið landráð. Hvernig kemur þetta heim og saman við stofnun þessara reikninga? Jú, þarna var framin gjörningur af íslenskum einkaaðilum sem skuldbatt íslenska ríkið og þegna þess til greiðslu á milljörðum króna, hundruðum milljarða ef ekki þúsundum milljarða króna. Íslenskir þegnar voru aldrei spurðir um leyfi og engin í íslenski ríkisstjórn hefur getað svarað þeirri eðlilegu spurningu hvort ríkisstjórnin hafi heimilað þetta. Þess ber að geta í þessu samhengi að alþjóðlegar reglur kveða á um að yfirvöld ríkja séu ábyrg fyrir gjörningum af þessu tagi. Ég býst við að þeir sem sömdu þessar reglu hafi ekki haft ímyndunarafl til að sjá þessi ósköp fyrir. Heil þjóð bundin á skuldaklafa sökum gjörða nokkurra einstaklinga á erlendri grund. Hagsmunir Íslands og þegna þess sem og orðspor þjóðarinnar er varanlega skaðað. Er það ekki alvarlegur glæpur?
100. gr. almennra hegningarlaga hljóðar svo:”100. gr. a. Fyrir hryðjuverk skal refsa með allt að ævilöngu fangelsi hverjum sem í þeim tilgangi að valda almenningi verulegum ótta eða þvinga með ólögmætum hætti íslensk eða erlend stjórnvöld eða alþjóðastofnun til að gera eitthvað eða láta eitthvað ógert eða í því skyni að veikja eða skaða stjórnskipun eða stjórnmálalegar, efnahagslegar eða þjóðfélagslegar undirstöður ríkis eða alþjóðastofnunar fremur eitt eða fleiri af eftirtöldum brotum, þegar verknaðurinn í ljósi eðlis hans eða með hliðsjón af aðstæðum þegar og þar sem hann er framinn getur skaðað ríki eða alþjóðastofnun alvarlega:
1. manndráp skv. 211. gr.,
2. líkamsárás skv. 218. gr.,
3. frelsissviptingu skv. 226. gr.,
4. raskar umferðaröryggi skv. 1. mgr. 168. gr., truflar rekstur almennra samgöngutækja o.fl. skv. 1. mgr. 176. gr. eða veldur stórfelldum eignaspjöllum skv. 2. mgr. 257. gr. og þessi brot eru framin á þann hátt að mannslífum sé stefnt í hættu eða valdið miklu fjárhagslegu tjóni.
Hér er talað um hryðjuverk. Stofnun þessara reikninga og afleiðingar þeirra eru ekkert annað en fjárhagslegt hryðjuverk skv. þessari grein. Þetta er líklega afdráttarlausasta greinin. Hér er notast við orðalag eins og: valda almenningi verulegum ótta, þvinga íslensk eða erlend stjórnvöld til að gera e-ð eða láta ógert, veikja eða skaða efnahaglegar og þjóðfélagslegar undirstöður ríkisins. 4. töluliður sömu greinar tekur m.a. til mikils fjárhagslegs tjón. Hvað hefur komið á daginn? Hér hefur ríkt almennur ótti við afleiðingar bankahrunsins, afleiðingar aðgerða manna í bankageiranum sem og aðgerðaleysi. Bresk stjórnvöld telja sig hafa verið þvinguð til að nota hryðjuverkalög til að tryggja hag bresks almennings og annarra aðila þar í landi s.s. líknarfélaga, sveitarstjórna ofl. Íslensk stjórnvöld urðu að setja neyðarlög til að tryggja hag íslensks almennings í kjölfarið. Þjóðfélagslegar og efnahagslegar undirstöður íslensks þjóðfélags eru afar veikar í dag sökum aðgerða þessara manna sem og aðgerðaleysis þeirra. Þess ber að geta að svipaðir reikningar voru stofnaðir í Hollandi, Belgíu, Lúxemborg, Noregi, Svíþjóð og Finnlandi.
Það er stórundarlegt að þeir sem stuðluðu að þessum hörmungum séu enn við völd og enn er verið að mæra útrásarmenn og vernda þá. Er réttnefni þeirra landráðmenn? Ætlum við að leyfa landráðamönnum, hvort sem það eru núverandi valdhafar sem enga ábyrgð axla eða útrásarliðið, að halda sínu og vel það eða ætlum við að láta landráðmennina axla sína ábyrgð og hljóta sína refsingu? Mér er spurn vegna þess að utan við morð og nauðgun eru landráð einhver alvarlegasti glæpur sem nokkur persóna hver sem hún er og hvort sem það er af gáleysi eða ekki getur framið. Myndum við láta grunaðan morðingja eða nauðgara um rannsókn máls? Nei, það myndum við ekki gera. Af hverju þorir engin að nefna þetta og þegar það er gert er það í framhjáhlaupi og engin fylgir málinu eftir. Er ég sá eini sem þorir?