Nóg er bullið samt
Það er merkileg árátta hjá okkur Íslendingum að hlaupa á eftir útlendingum með öfgafullar skoðanir á því hvað þjóðinni er fyrir bestu og boða það eins og fagnaðarerindi. Fyrir nokkrum dögum var hér á Smugunni frétt um enn einn snillinginn sem er að koma til landsins að segja okkur eyjaskeggjum norður í Ballarhafi hvernig við eigum að bjarga okkur út úr alþjóðlegum vandræðum. Bill Still heitir þessi nýjasti og í sem allra stystu máli leggur hann til að við hættum að borga skuldir okkar og lokum landinu á meðan skuldakerfi heimsins er að hrynja. Það muni bara taka nokkur ár að bíða eftir hruni heimshagkerfisins og þá muni streyma hingað allir gáfuðustu fjárfestar heims að fjárfesta í skuldlausa landinu. Ég veit svo sem ekki í hvaða heimi Bill Still lifir, en mig grunar að það sé einhver útgáfa af Excel forritinu.
Vissulega er peningakerfi heimsins gallað. Það byggir í grunninn á skuld en ekki verðmætasköpun og því eru peningar ekki lengur ávísun á verðmæti heldur ávísun á tiltrú sem er býsna fallvaltur gullfótur. Þetta breytir hins vegar ekki því að ráðleggingar Bill Still eru einhverjar þær allra vitlausustu sem ég hef augum litið og hefur þó ýmislegt skrautlegt rekið hér á fjörur undanfarin misseri. Til að byrja með myndi alger lokun landsins fljótt kalla dauðann yfir nokkur þúsund manns sem þurfa á lyfum og læknisþjónustu erlendis frá að halda. Því til viðbótar myndi allt atvinnulíf eins og það leggur sig fara á hliðina því það er nánast engin atvinnugrein í öllu landinu sem ekki reiðir sig á hráefni eða þjónustu erlendis frá. Þrátt fyrir endurteknar möntrur sumra ráðamanna um að innlendur landbúnaður tryggi matvælaöryggi landsins er útilokað að við gætum fætt 300 þúsund manna þjóð af því sem hér er hægt að rækta án þess að eiga olíu á vélar. Það kann þó vel að vera að dæmið gengi upp þegar búið væri að draga frá þessum 300 þúsund alla þá sem hugmynd Bill Still myndi murka lífið úr eða hrekja á flótta. Sú mannfjöldatala sem landið bar þegar best gekk í sögu sjálfsþurrftarbúskapar var um 45 þúsund en rétt er að hafa í huga að þá var landið opið og viðskipti með korn og aðra nauðsynjavöru.
Rétt eins og fjöldi annarra þjóða skuldar Ísland helling af peningum. Þær skuldir eru hluti af peningahagkerfi heimsins en margir hafa bent á að það sé gallað og gæti fallið eins og önnur mannanna verk. Ef til þess kemur þá verður heimshrun og upp af rústum þess mun vonandi rísa betra kerfi sem við getum þá tekið þátt í að byggja upp. Slíkt kerfi gæti byggt á gjaldmiðlum sem eru ávísun á raunveruleg verðmæti og kannski ættu Íslendingar að byrja strax að huga að slíkum breytingum. Íslenska krónan gæti byggt á verðmætasköpun í landinu auk hins íslenska gullfótar – verðmætrar náttúru og auðlinda sem okkur er falið að vernda og skila jafn góðum eða betri til næstu kynslóða.
Slíkar hugmyndir er hægt að ræða og sérfræðinga á því sviði skulum við endilega fá hingað til skrafs og ráðagerða. En í öllum bænum sleppum því að draga hingað fólk með jafn foráttuvitlausar hugmyndir og Bill Still hefur um íslenskt þjóðfélag. Nóg er bullið samt.
Dofri Hermannsson
Athugasemdir (7)
-
Jón Jón Jónsson skrifar:
Dofri hlýtur að vera að meina ríkisstjórn Jóhönnu og Steingríms í boði AGS og strengjabrúða stríðs-kapítalistanna í Brussel,
ESB ráð-stjórn forræðis og skrifræðis júgur krata ... á sjálfum sér bólginni græðginni ... er það ekki rétt skilið hjá mér Dofri?
Góð lýsing hjá Dofra á sjálfum honum líkum:
\"Það er merkileg árátta hjá okkur Íslendingum að hlaupa á eftir útlendingum með öfgafullar skoðanir á því hvað þjóðinni er fyrir bestu og boða það eins og fagnaðarerindi.\"
Nei!
Við eigum auðlindir okkar! Ekki AGS! Ekki þýska stál- og kolabandalagið! -
Þórarinn Einarsson skrifar:
Æ Dofri, mikið varstu óheppinn þarna!
Bullið sem þú ert að tala um er að mestu leyti þínar ranghugmyndir og misskilningur.
Nú verður þú að læra heimavinnuna þína kallinn.
Nú skaltu horfa á \'The Money Masters\' og \'The Secret of Oz\' og þá nærðu kannski inntakinu í því sem hann er að leggja til.
Þá getur þú e.t.v. skrifað ágætis grein um hugsanlegar neikvæðar afleiðingar af því að segja upp skuldaþrældómnum og því að gera róttækar breytingar á fjármálakerfinu.
En þessi grein hjá þér Dofri finnst mér bara endurspegla þína fordóma neikvæðni, undirlægjuhátt, hræðslu og málefnafælni. Þú mættir alveg vera uppbyggilegri og upplýstari um það sem þú ert að skrifa um. Gangi þér betur næst! -
Þórarinn Einarsson skrifar:
Værir þú samt til í Dofri að birta þennan lista yfir þessa meintu snillinga sem þú hefur í huga. - Væri fróðlegt að sjá. Takk!
-
Gunnar Skúli Ármannsson skrifar:
Sæll Dofri,
mér finnst þú vanmeta skaðsemi skuldarinnar á heimsvísu og núverandi fjármálakerfis. Mæli með að þú lesir sögu skuldarinnar einu sinni enn. -
Auðun Gíslason skrifar:
Já, góðan daginn! Ég bara held, að þessi maður þurfi á endurmenntun að halda. Var það ekki þannig, sem fyrrverandi þingmaður, ráðherra og varaformaður Sjálfstæðisflokksins orðaði það, þegar einhver útlendingsbjálfi vogaði sér að benda á ástandið hér í \"góðærinu\" á vakt Samfylkingarinnar mútuþægu. Á vald.org sá ég svipaðar hugmyndir og Bill Still er hér að viðra. Það er kannski bara allt rugl, nema boðskapur AGS og ESB?
Ég verð bara að segja, að mér blöskrar að lesa þetta sjálfumglaða rugl Samfylkingarmannsins Dofra Hermannssonar. Þvílíkur andskotans hroki! En frekar vill Dofri sjálfsagt fylgja frjálshyggjustefnu AGS þar til hér er kominn á harðsvíraður Thatcher-ismi, en að opna hugann fyrir nýjum hugmyndum. Þær gömlu klikkuðu nefnilega. Líka þessar sem Dofri og Samfylkingin fylgir! Er ekki komið nóg af hroka og drambi íslenskra framapotara í aula-pólitík? Bless Dofri! Mundu að dramb er falli næst! -
Karólína Einarsdóttir skrifar:
Einhvern veginn finnst mér eins og ég hafi heyrt þetta áður, þ.e. að skammast yfir því að útlendingar séu fengnir hingað til lands til að gagnrýna, gott ef það var ekki einmitt á góðæristímanum þegar allt \"lék í lyndi\" og enginn mátti gagnrýna neitt á Íslandi.
Ég fagna því að það skuli vera til fólk í þessu hjarðríki Íslandi sem er gagnrýnið og tilbúið til að leggja mikið á sig, án þess að fá krónu greidda fyrir, til að opna augu almennings.
Ég held að enginn ætti að gagnrýna Bill Still fyrr en sá hinn sami hefur horft á myndirnar hans og sjá hvað hann hefur fram að færa. Bill Still hefur stúderað fjármálakerfi heimsins í nær þrjá áratugi og ef hann hefur öfgafullar skoðanir á því þá er ástæða fyrir því. Annars finnst mér betra að nota orðið róttækni í stað öfga.
Þá langar mig að benda á að sjálfsþurftarbúskapstímabilið sem minnst er á hér í greininni er fyrir 1900 og það hefur nú mikið vatn runnið til sjávar í landbúnaði síðan, m.t.t. tækni og vísinda. Við höfum alveg burði til þess í dag að brauðfæða alla Íslendinga með því að nýta auðlindir okkar til lands og sjávar á sjálfbæran hátt. Það eina sem okkur skortir er viljinn!
-
S.Á. skrifar:
Ég hef ekki heyrt skoðanir þessa Bill Still, en efast ekki um, að fjármálakerfi heimsins er meingallað. Bandaríkin munu t.d. aldrei geta borgað allar skuldir sínar, öðru vísi en að rýra verðgildi dollarans með verðbólgu. Þetta held ég, að allir hagfræðingar geri sér nú orðið grein fyrir. Íslendingar geta tæplega borgað skuldir sínar nema vera svo sniðugir að bjóða vöruskiptaverslun við Evrópu: Evrópa drekkur vatns, sem hefur runnið í gegnum nýru margsinnis, vatn sem m.a. inniheldur östrogen úr pillunni auk annarra lífrænna efna, þrávirkra. Með því að nota 3% af lindarvatninu í Brúará, bara til að nefna dæmi, gætum við selt Bretum og Hollendingum 1 teningsmetra á sekúndu af besta drykkjarvatni heims. Við eigum að bjóða þeim að sækja þetta vatn hingað á tankskipum, og reikna lítrann á kr. 10. Þannig gætum við fengið kr. 864 milljónir á dag. Takið eftir: Vöruskipti. Það tæki okkur ca. þrjú ár að greiða Icesave, miðað við að allt færi á versta veg um verðmæti eignasafns Landsbankans. Mér finnst sjálfsagt að reikna með að allt fari á versta veg. Eftir þrjú ár, verða Bretar og Hollendingar orðnir háðir besta drykkjarvatni sem býðst (ég er ekki að segja, að annars staðar geti ekki fundist jafngott vatn, en örugglega hvergi betra en við erum svo heppin að eiga hér á landi). Þá getum við selt þeim vatn fyrir tæpann milljarð á dag, og hver veit nema fleiri en Hollendingar í niðurlöndum Rínarfljóts myndu vilja eiga kost á góðu vatni.
Ef Sádar hefðu aldrei flutt olíuna út nema á 30 cl flöskum byggju þeir ennþá í tjöldum. Við getum flutt út til einhverra lúxuskjána vatn á slíkum flöskum á margföldu lítraverði, sbr. það að Raddison SAS hótel býður gestum sínum ekki lengur kranavatn heldur vatn á plastflöskum (svei!).
Finnar greiddu Rússum stríðsskaðbætur eftir seinna stríð, með því að smíða fyrir þá flottasta kaupskipaflota í heimi. Nú eru flestar ofurferjur og skemmtiferðaskip byggð í Finnlandi, enda verkþekkingin mest þar í skipasmíðum.
Karólína: Hugsjón þín um að lifa af lopa og lambakjöti gengur ekki upp. Við þurfum alls kyns innflutt aðföng fyrir landbúnaðinn, t.d. dráttarvélar og olíu á þær, áburð og ýmis lyf, svo dæmi séu tekin. Sjálfsþurftarbúskapur er ekki lausnin á skuldavanda heimsins. Hins vegar er það argasta óréttlæti, að eingöngu eitt ríki, geti ákveðið að greiða skuldir sínar með mun verðminni dollurum, en það fékk að láni. Þess vegna getur þurft að gefa þjóðum upp skuldir, svo allir sitji við sama borð. Eins er viðbúið, að margir þeir sem eiga of fjár, yrðu ekkert verr settir þótt peningalegar eignir þeirra yrðu minnkaðar um t.d. 90% með einu pennastriki.
En að segja eins og Samfó og SJS, að við getum vel borgað, án þess að benda á hvernig, er ekki mjög sannfærandi. Steingrímur og Jóhanna eru farin að minna nokkuð mikið á Skugga-Svein og Ketil skræk.
Skrifa athugasemd