Hver er alþýða þessa lands?
Í viðtalinu gagnrýnir hann flokksforystuna og samsetningu hennar, sem hann segir vera millistétta- og háskólafólk sem misst hafi tengslin við alþýðu landsins sem nú berjist í bökkum. Sóley er ritari flokksins og þarf því að taka þessa gagnrýnin til sín. Þá er mér spurn: Hver er alþýða þessa lands? Er einhver ákveðinn hluti alþýðunnar betri en annar? Hvaða hluti alþýðu er það sem berst í bökkum? Er svokallað millistétta- og háskólafólk ekki alþýða Íslands eða er það aðeins hópur verkafólks sem vinnur líkamlega erfiðisvinnu sem má skilgreina sem alþýðu landsins? Hvers konar aðgreiningu er Þorleifur borgarfulltrúi Vinstri grænna að setja fram og til hvers? Þannig vill til sem betur fer að menntun fólks á Íslandi hefur almennt aukist og mjög stór hópur ungs fólks fer bæði í framhaldsskóla og áfram í lengra nám. Það hefur hingað til verið talinn kostur hve þjóðin er vel menntuð og á fjölbreyttan hátt. Það hefur jafnframt verið keppikefli foreldra að mennta börn sín sem best til þess að tryggja þeim sem best veganesti út í lífið. En þrátt fyrir góða menntun og þokkalega atvinnu á fjöldi fólks á Íslandi samt í erfiðleikum fjárhagslega og berst í bökkum. Má ekki telja þetta fólk alþýðu Íslands?
Þorleifur tekur svo sterkt til orða að það sé stærsta vandamál hreyfingarinnar að hún hafi ekki bein tengsl við alþýðuna. Við hvaða fólk á hann og í hverju eru hin beinu tengsl við alþýðuna fólgin? Hefur hann einn verið að vinna fyrir alþýðuna? Sóley Tómasdóttir er alin upp af alþýðufólki í báðar ættir, meira að segja Alþýðubandalagsfólki langt aftur í ættir. Hún er komin af fólki sem tók virkan þátt í verkalýðshreyfingunni og barðist fyrir bættum kjörum alþýðunnar. Þennan bakgrunn þekkir Sóley mæta vel, sem hefur meðal annars mótað lífssýn hennar og áherslur.
Annað sem vekur athygli mína í viðtalinu eru vangaveltur Þorleifs um átökin í forvalinu og efasemdir fólks um að rétt hafi verið staðið að málum. Þeir sem til þekkja vita að þar tapaði hann fyrsta sætinu til Sóleyjar. Hvernig stendur á því að Þorleifur kemur aftur með þessar efasemdir þegar það er löngu búið að úrskurða af forvalsnefnd Vinstri grænna í Reykjavík að svo var ekki? Það var Þorleifur sjálfur sem taldi að rangt hefði verið haft við, en ekki einhverjir óskilgreindir „sumir“ eins og hann orðar það í viðtalinu. Það var hann sem kærði, en fékk úrskurð um að svo hefði ekki verið. Eins og sjá má á heimasíðu Vinstri grænna í Reykjavík um niðurstöðu talningar úr forvalinu þá vann Sóley forvalið hvort heldur talin voru atkvæði greidd á kjörstað eða með utankjörstaðaatkvæðum. Þetta veit Þorleifur vel og sætti sig við niðurstöðurnar á þeim tíma. Hvaða tilgang hefur það þá núna að rifja þetta upp?
Að mínu mati voru átökin í forvalinu ekki hörð. Í forvalinu var fullt af góðu fólki sem bauð sig fram og stuðningsfólk hjálpaði til fyrir sinn frambjóðanda eins og eðlilegt er. Þar hafði Sóley öflugt lið sem lagði mikið á sig til þess að vinna henni brautargengi. Það gerði ég faðir hennar, móðir, systur, önnur skyldmenni og hópur feminista. Öll unnum við í góðri trú um að við værum að fara eftir settum reglum sem forvalsnefnd hafði samið. Á forvalsdegi sat ég og vann við hliðina á öðrum frambjóðanda Vinstri grænna sem hafði sama skilning á reglunum og gerði nákvæmlega það sama og stuðningsfólk Sóleyjar til þess að afla atkvæða. Ekki hef ég séð Þorleif gagnrýna aðra en Sóleyju fyrir þann verknað. Þegar Þorleifur gefur í skyn að fólk hafi farið á svig við forvalsreglur, er hann að væna alla þá sem unnu fyrir Sóleyju og hana sjálfa um að hafa meðvitað svindlað til þess að ná hagstæðum úrslitum. Undir slíkum ásökum vil ég að minnsta kosti ekki sitja. Hafi Vinstri hreyfingin grænt framboð misst atkvæði í kosningunum í Reykjavík sl. laugardag vegna vals á frambjóðendum á Þorleifur sjálfur að skoða sinn þátt í þeirri atburðarrás.
Þriðja atriðið sem Þorleifur nefnir sem skýringu á slakri útkomu Vinstri grænna eru femíniskar áherslur hreyfingarinnar. Í Morgunblaðinu er orðrétt vitnað í Þorleif þar sem hann segir: „Margir kjósendur sögðu mér að vegna þess hvernig ákveðnir aðilar settu þessa týpu af feminisma fram, þá treystu þeir sér ekki til að kjósa flokkinn. Það er alveg ljóst.“
Það er líka ljóst að þarna á Þorleifur við að Sóley hafi fælt kjósendur frá hreyfingunni og beri því ábyrgð á slakri útkomu kosninganna. Hafi svo verið þá er lítið við því að gera og vegna hvers? Jú, Sóley hefur með málflutningi um jafnrétti verið að fylgja eftir stefnu Vinstri hreyfingarinnar græns framboðs í kvenfrelsismálum, en ekki á einka flippi eins og halda mætti. Í því samhengi vil ég vitna í eftirfarandi lokaorð úr löngum stefnumálakafla Vinstri hreyfingarinnar græns framboðs um kvenfrelsi: „Markmiðið með femínísku starfi í VG er að gera mismunandi stöðu kvenna og karla í samfélaginu sýnilega og sýna hvernig kynbundið misrétti hefur áhrif á pólitískt ferli og ákvarðanir, sem móta líf okkar og samfélag. Markmiðið er einnig að breyta þessari skipan mála í pólitískri baráttu okkar. Þegar konur sæta ekki lengur kynferðisofbeldi og spurningin um kyn hefur ekki lengur áhrif á hvernig völd og áhrif deilast út milli kvenna og karla hefur kvenfrelsisbaráttan náð takmarki sínu. Kvennabaráttan kemur öllum í VG við. Það er óhugsandi að vinna vinstri stefnu brautargengi án kvennabaráttu.“
Það er alveg skiljanlegt að kjósendur séu ekki allir sammála stefnu Vinstri grænna og kjósi þar af leiðandi ekki framboðið í kosningum. Hitt er illskiljanlegra að Þorleifur, sem er annar maður á lista Vinstri grænna í Reykjavík og í forsvari fyrir hreyfinguna á síðasta kjörtímabili, leyfi sér að hafa efasemdir um áherslur flokksins á þessu sviði eins og skín í gegn af hans ummælum.
Þorleifur Gunnlaugsson hefur fullan rétt á því að viðra skoðanir sínar um slaka útkomu Vinstri grænna í Reykjavík. Að mínu mati skín þó í gegn pirringur hans yfir því að hafa orðið að lúta í lægra haldi fyrir Sóleyju í forvalinu og þegar á móti blæs hjá hreyfingunni í kosningum er freistandi að koma ábyrgðinni á hana. Auðvitað þarf Sóley eins og aðrir frambjóðendur að skoða sinn þátt í þessari kosningabaráttu og meta hvað hafi gengið vel og hvað ekki og bæta fyrir næstu kosningar. Til þess mun hún verða hvött af stuðningsmönnum sínum.
Nðurstaða mín er sú að það er ekkert að því að fólk sé ekki sammála hugmyndafræði í stjórnmálum, hvort heldur er í jafnréttismálum, atvinnu eða verkalýðsmálum. Ef fólk er ekki sammála hefur það örugglega kost á að kjósa einhvern annan flokk. Það á ekki að vera vinnulag flokks eða hreyfingar að breyta málstað eða áherslum til þess eins að fá sem flest atkvæði. Slíkt hafa aðrir flokkar gert með misgóðum árangri. Greinum niðurstöðu kosninganna á uppbyggilegan hátt og vinnum úr henni á jákvæðan hátt.
Tómas Jónsson, frambjóðandi Vinstri grænna í Kópavogi og faðir Sóleyjar Tómasdóttur
Athugasemdir (13)
-
Guðmundur Sigurðsson skrifar:
Mér þykir þetta góð grein Tómas, ekki síst fyrir þá staðreynd að þú ferð ekki fram með látum né yfirgangi. Sú kona er rík sem á þig fyrir föður.
-
Gurrí skrifar:
Frábær grein, takk.
-
kona skrifar:
Greinin er góð.
EN ég segi samt en, á maður að vera að blanda sér í svona umræðu þegar maður er svona náskyldur öðrum aðilanum?
Ég er mjög hrifin af Sóley og hennar störfum í borgarstjórn og tel EKKI að það hrun sem VG varð fyrir sé Sóley að kenna.
Þess vegna hefðu þessar deilur í forvalinu mátt kyrrar liggja. Nú að afloknum kosningum.
Það sem nú ber að hyggja að.
Eru nýjir starfshættir í borgarstjórn og þar mun Sóley koma sterk inn.
Nýjir starfshættir fjölmiðla og þar mun Sóley njóta góðs af.
Það eru sem sagt nýjir tímar og breytum orðræðunni í samræmi við það. Og við sjáum að jafnt pólitíkusar sem fjölmiðlafólk á erfitt með það!
Það er komin Sól í Reykjavík! -
Halla Gunnarsdóttir skrifar:
Orð í tíma töluð, Tómas!
-
Magga Pé skrifar:
Takk fyrir þetta Tómas.
-
edda magnúsdóttir skrifar:
Heill og sæll Tómas.
Þessg góða grein þín er að mínu mati þörf lesning öllum á okkar landi, hvar í flokki sem þeir standa.
Hún ætti að vekja fólk til umhugsunar um margt í mannlegum samskiptum. Meðal annars eftirfarandi:
Hefði Þorleifur Gunnlaugsson hagað sér á þennan hátt,ef að samframbjóðandi hans í Sóleyjar sporum, hefði verið með \"Spotta\" þ.e. karlmaður.
Hefði hann þakkað \"honum\" fyrir þau orð sem Sóley lét falla um hann Þ.G.
í viðtölum í fjölmiðlum.
Hefði honum fundist verðugra að tapa fyrir karlmanni???
Ef svo er, sannarlega kominn tími á hann að tapa fyrir jafnréttissinna eins og Sóleyju Tómasdóttur og jafnvel umgangast fjölskyldu hennar og vini.
Hvað varðar hugmyndir hans um mannleg gildi er auðvitað hans mál ,en einhverra vegna koma orðin öfund og óheilindi upp í huga minn.
Ég óska Þorleifi alls góða sem sannur félagi í V.G. og vona að hann beri sitt barr . -
Haraldur Ingi Þorleifsson skrifar:
Komdu sæll Tómas
Ég er að mörgu leyti sammála því sem \"kona\" skrifar hér að ofan. Það er eflaust ekki gott að blanda sér í umræður um fjölskyldumeðlimi. En það vill svo til að ég er sonur Þorleifs og eins og þú þá á ég erfitt með að þegja þegar talað er um einhvern svona náinn mér. Ég skil m.ö.o. vel að þú verjir dóttir þína og virði þig fyrir það. Ég vona að þú gerir slíkt hið sama fyrir mig.
---
Ég hafði ekki lesið viðtalið við Þorleif þegar ég las það sem þú skrifar hér þannig að ég varð mér út um það. Mér telst svo til að hann nefni fimm ástæður fyrir því gengi VG í borginni hafi verið eins og raunin varð.
1. Þjóðmálin og ríkisstjórnin. Þar nefnir hann sérstaklega HS Orku málið.
2. Hann segir að \"Okkar forysta samanstendur af millistéttarfólki, háskólafólki, sem hefur það ágætt og hefur misst tengslin við alþýðuna. Þá vill það verða að fólk fer í glerhús og hefur ekki þessi beinu tengsl við alþýðu manna sem berst í bökkum. Það held ég að sé okkar stærsta vandamál.\"
3. hann nefnir forvalsmálið og segir um það \"Sjálfsagt er það hluti af vandamálinu að það var ósátt um framkvæmd forvalsins. Sumir töldu að ákveðnir aðilar hefðu staðið að því á vafasaman hátt, að það hefði verið farið heim til fólks með kjörseðla og annað slíkt,\"
4. hann segir \"Margir kjósendur sögðu mér að vegna þess hvernig ákveðnir aðilar settu þessa týpu af femínisma fram, þá treystu þeir sér ekki til að kjósa flokkinn. Það er alveg ljóst.\"
5. Hann segir að yfirlag flokksins sé úr takti við grasrótina og nefnir þar sérstaklega AGS.
Þú gagnrýnir ekki punkta eitt og fimm þannig að við skulum láta þá milli hluta.
---
Punktur 2:
Þarna held ég að Þorleifur gerist sekur um að rugla saman hugtökum. Hann talar um alþýðu en ég held að hann sé að tala um það sem mætti kalla láglaunafólk. Sögulega séð má kannski tala um verkalýð. Mér finnst þetta auk þess að vissu leyti klaufalega orðað hjá honum. Eða það kann að vera að samhengið vanti. Ég átta mig ekki á því.
En til að byrja með sé ég enga ástæðu að túlka þessa skoðun sem árás á Sóleyju. Það finnst mér heldur langt seilst þegar forysta flokksins telur tug manna.
Í öðru lagi þá held ég að það sé ansi hæpið að ætla að Þorleifur sé sjálfur láglaunamaður. Hann hefur tilheyrt millistéttinni a.m.k síðan hann byrjaði að þiggja borgarfulltrúalaun fyrir tveimur árum. Það mætti þessvegna alveg eins segja að hann sé að gagnrýna sjálfan sig.
Það sem hann er hinsvegar að kalla eftir að mínu viti er að róttækur vinstri flokkur eigi að vera í sterku sambandi við verkalýðshreyfingar (reyndar ræður þar líka almennt millistéttarfólk sem er að mínu mati ekki í miklum tengslum við sína umbjóðendur) en þó sérstaklega það fólk sem hefur það verst.
Ég fyrir mitt leyti verð að vera sammála þessari túlkun. Ég er sjálfur nokkuð vel menntaður og get alls ekki talist til láglaunamanna. Það er enginn ókostur að vera menntaður og það er gott að fólk í okkar röðum sé vel menntað. Það er að sama skapi ekkert að því að þiggja mannsæmandi laun fyrir sína vinnu.
En mér finnst eins og Þorleifi að það vanti betri tengingar við þann stóra hluta fólks sem hefur ekki í sig og á. Þar með þarf ekki að ýta hinum vel menntuðu út, heldur á þverrt á móti að halda þeim vel að sér á sama tíma og flokkurinn fer inn í verkalýðsfélög, stéttarfélög, öryrkjabandalagið o.s.frv. og leitar eftir að draga inn fólk sem þar er að finna.
Rauðsokkurnar töluðu víst mikið um samstöðu námsmanna og verkalýðs. Mér finnst vera mikið af góðum námsmönnum í VG en það hallar of mikið á verkalýðinn að mínu mati.
---
Punktur 3:
Eins og þú veist þá voru ástæðurnar fyrir deilum um forvalið á endanum raktar til misvísandi ummæla kjörstjórnarmeðlima um túlkun á reglum. Um það sagði Þorleifur á bloggi sínu 11. febrúar \"Því miður gerðist það svo að þegar stuðningsmenn annarra frambjóðenda báðu um skýringar á þessu sama ákvæði þá var þeim sagt að þeim væri leyfilegt að fara á milli með prentaða kjörseðla heim til fólks og koma þeim síðan til skila. Mér er sagt að sami háttur hafi verið á í tveimur síðustu prófkjörum vegna alþingiskosninga. Ég vil þessvegna ítreka að þetta fólk starfaði í góðri trú eftir því sem þeim var tjáð að væri leyfilegt. Það er vel skiljanlegt þegar naumt er á munum að stuðningsfólk stundi það sem það telur að allir aðrir séu að gera.\"
Það er ekki hægt að lesa út úr þessu neitt annað en að Þorleifur sé á þeirri skoðun að ekki hafi verið framið vísvisandi svindl þar sem stuðningsmenn Sóleyjar fóru eftir túlkun sem þeir fengu frá kjörstjórnarmeðlimi.
Hinsvegar hlýtur að vera skilningur á því hjá öllum að það er einstaklega vont að frambjóðendur vinni eftir misvísandi reglum. Það er að mínu viti auk þess ekki góð vinnuregla í kosningum að hægt sé að fara með kjörseðla heim til fólks og koma þeim síðan til skila.
Þessa skýringu á því af hverju fólk vildi ekki kjósa flokkinn hef ég heyrt í mismunandi útgáfum út um allan bæ. Að neita að horfast í augu við það að þetta hafi haft einhver áhrif á niðurstöðuna tel ég vera mikinn óraunsætt.
Að sama skapi held ég að það hafi verið einhverjir sem voru ósáttir við það hvernig Þorleifur hagaði sér í málinu og þeim er alveg frjálst að tjá þá skoðun. Það má eflaust rekja eitthvað af ósigrinum til þess eins og þú nefnir.
---
Punktur 4:
Þarna verð ég eiginlega að segja það sama og í þriðja punktinum. Þetta er einfaldlega altalað út um allan bæ. Stór hluti kjósenda vildi ekki kjósa VG útaf þeirri tegund femínisma sem þeim finnst Sóley standa fyrir. Það þarf eiginlega ekki að tala við mjög marga til að átta sig á því að fólk taldi þetta vera ein af ástæðum þess að það gæti ekki kosið VG.
Það er síðan allt annað mál hvort fólki finnist þetta sanngjarnt hjá kjósendum. Ég get alveg sagt að ég myndi kalla sjálfan mig mikinn femínista. Ég held að þegar kemur að hugmyndafræði femínisma þá er ég líklega 90% sammála Sóleyju.
---
Ekki veit ég hvort þú hafir haft nennu til að lesa þessa langloku Tómas. En ef þú hefur þraukað alla leið þá vil ég óska þér og þínum mjög svo frambærilegu dætrum alls hins besta í framtíðinni.
Kv
Halli -
Hlynur Hallsson skrifar:
Takk fyrir frábæra grein Tómas.
-
Kristín Jónsdóttir skrifar:
Kærar þakkir fyrir frábæra grein.
Mér finnst eðlilegt að þér skuli renna blóðið til skyldunnar. Ekki síst fyrir það að Þorleifur hefur ítrekað reynt að gera tortryggilega þátttöku stuðningsfólks Sóleyjar í forvalinu og þ.a.l. sigur hennar. Það hefði verið bráðsnjallt hjá honum að kynna sér forvalsreglurnar áður en hann fór að tjá sig um málið. Þessi gagnrýni hans hefur væntanlega komið honum sjálfum í koll í borgarstjórnarkosningunum, ekki glæsileg kosning Sóleyjar í forvalinu.
Ef honum hefði verið alvara í að koma (flestum!) baráttumálum VG að í kosningunum þá hefði líka verið sniðugt að vinna einarðlega með Sóleyju - ekki á móti. -
Kjartan Jónsson skrifar:
Takk fyrir fína grein!
Og takk Halli fyrir þitt innlegg líka!
Ég var mikið að reyna að vinna okkar góða flokki fylgi í kosningabaráttunni og ég verða að segja að báðir hafið þið all nokkuð til ykkar máls. Oftast voru nefnd tvö atriði í mín eyru, sem ástæður þess að fólk treysti sér ekki til þess að kjósa VG.
Í fyrsta lagi þá var það óeiningin innan flokksins og var þar fyrst og fremst neft til sögunnar Lilja Mósesdóttir og Ögmundur, en síðan var rætt um deilur Þorleifs og Sóleyjar vegna forvalsins.
Í öðru lagi var neft að Sóley væri svo öfgafullur femínisti að fólk gæti ekki hugsað sér að kjósa hana. Þar heyrðist m.a. að fólki finndist að hún vildi láta okkur núlifandi karlmenn greiða fyrir árþúsunda kúgun á kynsystrum hennar. Ég reyndi að leiðrétta þennan misskilning, en gekk lítið með það.
Auðvitað voru nefnd fleirri atriði eins og Magma, ekkert verið að gera í þágu þeirra sem verst eru staddir eftir hrunið og fl. í þessum dúr.
Ég tek hinsvegar undir það að ákveðin menntahroki og menntasnobb er til staðar innan VG, en að Sóley eigi þar hlut að máli er alls ekki rétt, því ég hef ekki fundið neitt slíkt í hennar fari. Hún er einlæg og virkar á mig sem þægileg og góð manneskja, eins og Þorleifur og flest hin sem í framboði voru fyrir VG.
Það eina góða sem kom út úr þessum niðurstöðum kosningana virðist vera það að núna virðast allir flokkarnir, nema Framsókn, vera reyðubúnir að fara í gagngera naflaskoðun og er það vel. -
Ágúst Valves Jóhannesson skrifar:
Góðir punktar hjá Halla.
-
Þór Saari skrifar:
Við skulum ekki gleyma því að frumvörpin um persónukjör sem Alþingi hefur til meðferðar stranda á afstöðu kvenna í VG og Samfó. Andstöðu vegna einhverra mjög einkennilegra jafnréttissjónarmiða sem gera kröfu um fyrirfram ákveðin sæti beggja kynja á framboðslistum. Þó jafnrétti og jafréttisbaráttan verði ætíð að vera ofarlega í hugum okkar þá megum við ekki fórna lýðræðislegum valmöguleikum fólks í kosningum vegna þess. Þá hefur jafnréttisbaráttan snúist upp í andhverfu sína og er orðin að baráttu fyrir forréttindum einstakra þjóðfélagshópa. Lýðræðishugsjónir VG hafa verið fyrir borð bornar og fylgið er í samræmi við það og er það vel.
-
Halldór Ásgeirsson skrifar:
Ég er sammála því sem fram kemur í grein Tómasar, að flestu leiti. Þar tekur hann ekki stórt upp í sig. Hið slæma gengi Vg í kosningunum hér í Reykjavík er örugglega ekki Sóleyu að kenna. Ég held að það sé ekki heldur Þorleifi að kenna. Hins vegar finnst mér það miður, og það mjög miður ef skella á skuldinni á hana. Jafnframt finnst mér það ekki rétt að hefja innbyrðis deilur í röðum okkar Vg- manna og kvenna. Þess vegna þarf að slíðra sverðin hið fyrsta og hefja starfið upp í nýjar hæðir og víddir. T.d. er ég ekki sammála í einu og öllu, þeim sem leiða starf Vg í Reykjavík, né heldur á landsvísu.
Samt finnst mér ég hvergi í stjórnmálasamtökum eiga betur heima en í Vinstri hreyfingunni grænu framboði. Mega bæði Sóley sem og Þorleifur vel við una. Það stefnir allt í að við verðum í minnihluta á þessu nýhafna kjörtímabili. Ég öfunda ekki þá sem verða í meirihluta. Þeirra býður erfitt starf. Við skulum hugsa fram á við. Okkar tími kemur fyrr en varir. Lifið heil.
Skrifa athugasemd