Úr Dagvaktinni á bókmenntavaktina
„Herra Rós talar eingöngu við sjálfan sig og þá oftast um stjórnmál. Stundum er hann sammála, stundum ekki. Haraldur Sigfússon á sér þann draum að búa í piparkökuhúsi og á fimmtugsafmæli sínu tilkynnir hann að það sé loksins komið að því.“ Þannig er tveimur sagnanna í Stórkostlegt líf Herra Rósar – og fleiri sögur af ótrúlega venjulegu fólkilýst, en bókin er frumraun leikarans Ævars Þórs Benediktssonar í bókaskrifum, en hann þekkja líklega flestir sem sveitapiltinn unga og sakleysislega sem á vingott við Georg Bjarnfreðarson í Dagvaktinni, en Ævar hefur stundað nám við leiklistardeild Listaháskólans.
Bókin mun koma út hjá Nykri innan skamms og hér eru nokkur dæmi um fleiri sögur í bókinni:
„Jón Jónsson er venjulegasti maður landsins samkvæmt meðaltali og Gunnar er til í tveimur eintökum. Einhvers staðar, efst á hárri byggingu, stendur ónefndur maður á brún og horfir niður. Hann ætlar sér að stökkva en það eru ákveðnir hlutir sem verða að gerast áður. Svo er það stelpan sem vinnur í kirkjugarðinum, hún hreinlega lifir fyrir miðvikudaga. Á miðvikudögum er nefnilega kveikt á líkbrennsluofnunum og allur kirkjugarðurinn angar af vöflum.
Hér má einnig finna sögur af svaðilförum flatbökusendils, minnisleysi, mannáti, óhappdrætti, skuggaskorti og manninum sem býr til vísbendingar fyrir Jóladagatal Sjónvarpsins.“
Skrifa athugasemd