Rannsóknarskýrsla Alþingis er langsöluhæsta bókin það sem af er ári.  Fyrstu dagana beið fólk í biðröð í bókaverslunum eftir því að fá eintak en skýrslan seldist upp aftur og fólk mátti gera sér að góðu að bíða eftir næsta upplagi úr prentsmiðjunni. Bryndís Loftsdóttir verslunarstjóri í Eymundsson segir að í síðustu viku hafi hinsvegar einungis selst fjögur eintök af Rannsóknarskýrslunni í öllum bókaverslunum Eymundsson. ,,Þessi bjartsýna þjóð, er hún ekki bara hætt að hugsa um hrunið,“ segir Bryndís. Rannsóknarskýrslan seldist alls í sexþúsund eintökum en hún verður ólíklega endurprentuð enda var útgáfan mjög dýr og  ríkið reið því ekki feitum hesti frá metsölubókinni um hrunið, samkvæmt heimildum Smugunnar.

,,Lína langsokkur er hetja og Emil í Kattholti hefur sterka réttlætiskennd og ákveðna tegund heiðarleika. Kalli á þakinu einkenndist hins vegar af sjálfhverfu, móðgunargirni og yfirgangi," skrifar Ármann Jakobsson á Vinstra augað og játar blendnar tilfinningar til þessa hugarfósturs Astridar Lindgren. ,,En ég man að á sínum tíma fannst mér talsvert óljóst hvað hann hafði að sækja til þessa „vinar“ á þakinu sem var hálfgerður psýkópat. Bækurnar eru áhugaverð athugun á sálfræðikúgun en Kalli er stundum frekar óhugnanlegur en skemmtilegur."

Indverski rithöfundurinn, kvikmyndagerðarmaðurinn og aktífistinn Samarendra Das er hér á landi til að kynna útkomu nýrrar bókar sem hann skrifaði með forleifafræðingnum Felix Padel, Bókin heitir Out of This Earth: East India Adivasis and the Aluminium Cartel, og er gefinn út af Orient Black Swan útgáfunni. Hana mætti kalla „svartbók áliðnaðarins“ en hún dregur fram dökkar hliðar þessa iðnaðar.. 

Miðvikudaginn 18. ágúst kl. 20:00 verður Samarendra með fyrirlestur og kynningu á bókinni í Reykjavíkur Akademíunni, Hringbraut 121. 

,,Auðvitað er ekkert nýtt að nýjar bækur sæki innblástur til gamalla. Eina slíka var ég að lesa um helgina í fyrsta sinn, The Wide Sargasso Sea eftir Jean Rhys," skrifar Ármann Jakobsson. ,,Sú bók er viðbót við sígildu skáldsöguna Jane Eyre eftir Charlotte Brontë. Sem kunnugt er gekk Jane Eyre að eiga hinn dularfulla Rochester í sögulok en áður hafði það staðið í vegi fyrir hamingju þeirra beggja að hann var giftur konu frá Vestur-Indíum sem var brjáluð og því vel geymd á háaloftinu. Þessi kona var bæði kjarninn í ráðgátu bókarinnar og óvættur eða andstæðingur Jane. Í sögunni heitir hún Bertha Mason og Jean Rhys segir sögu hennar í sinni skáldsögu sem er 120 árum yngri en Jane Eyre."