Ráðherra fundar með hælisleitendum
Dómsmálaráðherra mun funda með hælisleitendum og stuðningsmönnum þeirra í dag
Ragna Árnadóttir, dómsmálaráðherra mun funda með flóttamönnum og stuðningsmönnum þeirra í dag. Fundurinn var ákveðinn í gær þegar fjölmennur hópur gekk að heimili hennar og krafðist réttar fyrir hælisleitendur á Íslandi.
Fréttatilkynning
Í dag, þann 30. mars, eiga flóttamenn og stuðningsmenn þeirra fund með dómsmálaráðherra. Fundurinn var ákveðinn í gær þegar um 70 manna hópur gekk frá Lækjartorgi að heimili dómsmálaráðherra til að krefjast réttar hælisleitenda til að setjast að hér á landi og njóta fullra mannréttinda. Meðal göngumanna voru flóttamenn úr flóttamannabúðum á Fitjum í Njarðvík.
Helsta krafa hópsins er sú að dómsmálaráðherra beiti sér fyrir því að Útlendingastofnun setji mannúðarsjónarmið í fyrirrúm og hætti að misnota Dublinarákvæðið til þess að firra sig ábyrgð á vanda flóttamanna. Af þeim 603 einstaklingum sem sóttu um hæli á landinu í góðærinu 1990-2007 hafði einn erindi sem erfiði.
Umfjöllun um málefni hælisleitenda hefur einkennst af skilningsleysi bæði almennings og Útlendingastofnunar á aðstöðu flóttamanna og telja mótmælendur að fjölmiðlar hafi ekki sinnt upplýsingaskyldu sinni í þessum efnum. Það er þó til marks um hugarfarsbreytingu yfirvalda að heimili ráðherra skuli ekki hafa verið umkringt lögreglumönnum á meðan á mótmælum stóð og út af fyrir sig fagnaðarefni að Íslendingar skuli loks hafa eignast viðræðuhæfan dómsmálaráðherra.
Skrifa athugasemd