Lokar vinstri stjórnin gluggum?

12.5.2010 9:02 Fréttir

 „Ég held að við þurfum að horfast í augu við að sama hætta er uppi hjá okkur eins og jafnan hefur verið þar sem ástand af þessu tagi hefur skapast. Það er reynt að snúa bylgjunni við, reynt að ræna völdum og það má aldrei henda vinstrisinnuð stjórnvöld að gerast valdaræningjar. Við megum ekki taka þátt í að loka gluggum, við eigum að halda þeim opnum, og það sem ég hef haft áhyggjur af síðustu vikur og mánuði er að okkur hafi ekki tekist það sem skyldi – að við höfum um of verið í gamla farveginum hvað leyndarhyggjuna og forræðisstjórnmál áhrærir.“ Þetta segir Ögmundur Jónasson í viðtali í nýju tölublaði Rósturs, en þar talar hann einnig um viðvarandi byltingarástand sem hann lýsir sem galopnu þjóðfélagi „þar sem allir eiga aðgang að umræðunni og leynd sé ekki við lýði.“

Meðal annars efnis í nýju Róstri er grein Hauks Más Helgasonar rithöfundar um Hannes Hólmstein og 30 ára stríð hans og félaga hans um tunguna, Gunnar Theódór Eggertsson skrifar um kvikmyndahátíðina í Þessalóníku í Grikklandi og Helga Katrín Tryggvadóttir skrifar pistil um hamfarir og hagkerfi í kjölfar eldgossins og annan um Árna þátt Sigfússonar í stóriðjuáformum á Suðurnesjum og skuldasöfnun bæjarfélagsins. Blaðið má nálgast víðsvegar á götum bæjarins og í völdum sjoppum og kaffihúsum.

Senda grein