Hóta að rifta Stöðugleikasáttmálanum
Skötuselsfrumvarpið var tekið af dagskrá Alþingis að kröfu Sjálfstæðismanna síðdegis en sett inn aftur eftir mótmæli nokkurra stjórnarþingmanna. Samtök atvinnulífsins ákváðu á fundi í dag að hóta að segja upp stöðugleikasáttmálanum ef frumvarpið yrði samþykkt. Atli Gíslason formaður sjávarútvegsnefndar Alþingis á ekki ekki von á öðru en að greidd verði atkvæði um frumvarpið og það verði samþykkt. Standi SA við hótanir sínar er stöðugleikasáttmálinn fyrir bí.
Samkvæmt frumvarpinu fær sjávarútvegsráðherra heimild til að úthluta 2000 tonna skötuselskvóta til viðbótar við þau 2500 sem útvegsmenn fengu úthlutað. Leigja átti hluta kvótans eða 600 tonn en það gátu útvegsmenn ekki sætt sig við. Atli Gíslason segir að útvegsmenn telji sig eiga einkarétt á öllum afla á Íslandi. Það sé mjög langt seilst hjá Samtökum atvinnulífsins að hóta því að rifta stöðugleikasáttmála í miðri kreppu út af slíku máli. Jóhanna Sigurðardóttir segir að það séu stjórnvöld í landinu og þau geti ekki látið hagsmunasamtök eins og LÍÚ fleygja stefnumálum sínum út af borðinu.
Skrifa athugasemd