Aðstaða framleiðenda á landsbyggðinni jöfnuð
Fjármálaráðherra segir að um sanngirnismál sé að ræðs
Steingrímur J. Sigfússon, fjármálaráðherra segir að nú sé unnið að því í ráðuneytinu ásamt ÁTVR að breyta reglum áfengissölunnar um móttöku og dreifingu til þess að jafna stöðu að framleiðenda á landsbyggðinni við að koma vörunni á markað.
Kristján Þór Júlíusson, þingmaður Sjálfstæðisflokksins, lagði í vikunni fram þingsályktunartillögu um að fela fjármálaráðherra að taka til endurskoðunar reglur um móttöku og dreifingu ÁTVR í þeim tilgangi að jafna stöðu fyrirtækja á landsbyggðinni. Steingrímur segir hana seint á ferðinni hjá honum.
„Hann hefur haft ærinn tíma með sína menn í fjármálaráðuneytinu til að gera eitthvað í málinu. Það hefur verið mikill þrýstingur á þetta mál, sérstaklega af norðan, í nokkur ár, en það hefur ekkert gerst,“ segir Steingrímur og bætir við: „En nú kemur hann með þingsályktunartillögu þegar hann er kominn í minnihluta. Af hverju beitti hann sér ekki fyrir þessu þegar hann var í fjárlaganefnd og flokksbróður sinn í ráðuneytinu?“
Hann segir það af málinu að frétta að það hefði jafnvel staðið til að ganga frá því í dag, en forstjóri ÁTVR komst ekki til fundar. „Þetta er bara spurning um fyrirkomulag sem við þurfum að leysa í samráði við þau.“
Steingrímur segir málið snúa að því að jafna stöðu framleiðenda. „Það er ekki sanngjarnt að sum framleiðslufyrirtæki geti keyrt þessu á lyfturum á milli húsa sem kostar nánast ekki neitt, en önnur þurfi að borga stórar fjárhæðir til að koma vörunni inn í dreifingarkerfi ÁTVR.“
Steingrímur segir að farið verði í málið strax eftir helgi og hann segist hafa fullan hug á því að leysa þetta mál og geti gert það hjálparlaust.
Skrifa athugasemd