Fjármálaeftirlitið og Seðlabanki Íslands hafa sent fjármálafyrirtækjum tilmæli vegna tveggja hæstaréttardóma um gengislánin. Eins og kunnugt er komst Hæstiréttur að þeirri niðurstöðu að slík lán væru ólögleg og telur Seðlabankinn eðlilegt að miða við lægstu vexti Seðlabankans nema samið sé um annað.

,,Hvað ætla menn að gera ef þeir draga þessa umsókn til baka og næsta könnun leiðir í ljós yfirgnæfandi stuðning við ESB? Það er til mikils að vinna fyrir Íslendinga og orðspor okkar sem þjóðar að við sýnum staðfestu í samskiptum við aðrar þjóðir," segir Árni Þór Sigurðsson þingmaður VG sem segist þó enn þeirrar skoðunar að hagsmunum Íslands sé betur borgið utan ESB.

Fjárfestingarsjóður Landsbankans í orkuiðnaði sem var stofnaður árið 2001 undir nafninu Magma hefur engin tengsl við Magma Energy í Kanada að sögn Þorsteins Inga Sigfússonar sem sat í stjórn sjóðsins og lagði honum til nafnið. Hann segist sverja og sárt við leggja að honum sé ekki kunnugt um nein tengsl þar á milli en honum hafi þó dottið í hug að Halldór J. Kristjánsson hafi látið Magma Energy hafa nafnið

„Alla mína tíð í pólitík og verkalýðshreyfingu hef ég átt auðvelt með að miðla málum og komast að samkomulagi,“ segir Ögmundur Jónasson sem fagnar gagnrýni á flokksráðsfundi VG og er ánægður með málefnavinnu á fundinum.

Ragnar Aðalsteinsson lögmaður krefst þess að Lára V. Júlíusdóttir settur saksóknari víki vegna vanhæfis, í máli níumenninganna sem eru ákærðir fyrir þátttöku sina i Búsáhaldabyltingunni, þar sem hún gegni trúnaðarstörfum fyrir Alþingi á öðrum vettvangi. Lára V.er skipuð af Alþingi í bankaráð Seðlabankans.  Sextíu manns voru fyrir utan Héraðsdóm og fylgdust með þegar taka átti mál níumenninganna fyrir í morgun klukkan hálf níu.

Ragnar Aðalsteinsson mótmælti því ennfremur að þinghaldið væri lokað að hluta, en ekki er fleirum hleypt í þingsalinn en geta setið eða staðið þar með góðu móti og lögregla stæði vörð um dómhúsið og stjórnaði ferðum fólks þangað inn.

Hagsmunasamtök heimilanna óttast að bílánafyrirtæki verði sett í gjaldþrotameðferð til að eigendur þeirra komist hjá því að endurgreiða að fullu ofreiknaða vexti vegna ólöglegra lána. Þau skora á stjórnvöld að frysta tafarlaust nægar eignir og fé til að standa undir skaðabótaábyrgð.

Lilja Mósesdóttir varð fyrir vonbrigðum með ræður margra flokksfélaga á flokkráðsfundi VG um helgina og þótti of rík áhersla á uppgjör við einstaklinga frekar en málefni. Hún segir VG hafa gefið of mikið eftir í stjórnarsamstarfinu og það sé mikil vinna að halda Samfylkingunni vinstra megin við miðju. Hún studdi tillögu að ályktun um að hætta stjórnarsamstarfinu ef það væri ekki nógu vinstrisinnað. Tillagan var ekki samþykkt.

Jóhanna Sigurðardóttir forsætisráðherra er á meðal þeirra fyrstu sem ganga í hjónaband á grundvelli nýrra hjúskaparlaga, sem leyfa hjónavígslur fólks af sama kyni.

Samtökin 78 boða til Regnbogamessu í Fríkirkjunni í Reykjavík á sunnudagskvöldið til fagna nýum lögum en í dag er alþjóðlegur baráttudagur samkynhneigðra. Sérstakur gestur verður Ragna Árnadóttir, dómsmála- og mannréttindaráðherra.

Flokksráðsfundur Vg samþykkti ályktun í dag þar sem lagst er eindregið gegn sölu eða langtímaframsali á orkuauðlindum og orkufyrirtækjum. Flokksráðið vill að nefnd um erlendar fjárfestingar taki máli aftur til skoðunar. Setja eigi lög sem tryggi óskoruð yfirráð opinberra aðila á orkuauðlindum.

Bjarni Benediktsson var endurkjörinn í embætti formanns Sjálfstæðisflokksins á Landsfundi flokksins í dag. Pétur Blöndal alþingismaður sem bauð sig fram til formanns á síðustu stundu fékk 281 atkvæði en Bjarni fékk 573 atkvæði. 50 skiluðu auðu.

,,Samviska mín er hrein,” sagði Bjarni Benediktsson meðal annars í setningarræðu sinni við upphaf Landsfundar Sjálfstæðisflokksins sem hófst á fimmta tímanum. Hann sagði auðvelt að gera allt tortryggilegt í því andrúmslofti sem ríkti í þjóðfélaginu. Hann sagði Sjálfstæðisflokkinn bera ábyrgð á því að ríkisbáknið hefði þanist út og ekki hefði verið nægilega sterkur rammi um viðskiptalífið. Flokkurinn hefði hinsvegar ekki gert sig sekan um glannaskap, siðleysi eða lögbrot. Hann ítrekaði að Sjálfstæðisflokkurinn teldi hagsmunum Íslands best borgið utan ESB en umsóknin hefði aldrei verið í boði Sjálfstæðismanna heldur VG og Steingríms J:

,,Það var ekki ætlunin að hræða neinn  að óþörfu" sagði Gylfi Magnússon viðskiptaráðherra eftir ríkisstjórnarfund í dag þar sem gengislánin voru til umræðu. ,,Við erum bara að benda á staðreyndir málsins, ríkið á þriðjung í bönkunum og á því verulegra hagsmuna að gæta." Gylfi segir að það verði þungt högg fyrir sameiginlega sjóði landsmanna ef  Hæstiréttur úrskurðar að gengisbundin lán eigi að bera erlenda samningsvexti eftir að ólögmætt var að miða við gengi erlendra gjaldmiðla. Tjónið nemur um eitthundrað milljörðum króna.

,,Verðmætamat starfa á Íslandi er karllægt og litað ákveðinni þrældómsdýrkun.  Því lengur sem menn eru í vinnu, því mikilvægari hljóta þeir að vera, eða hvað,“ spyr Guðlaug Kristjánsdóttir formaður BHM í nýrri grein. ,,Kjarasamningar endurspegla verkleg störf, þar sem framlag er mælt í tímaeiningum og „uppmælingu“ almennt. Framgangur í starfi fæst með því að gerast verkstjóri, bera ábyrgð á fjármunum og bæta má við sig kaupi með auknu vinnuframlagi, aukavöktum eða yfirvinnu."

Þessi sorglega sjón blasti við þátttakendum í Hvalaskoðunarferð frá Húsavík á dögunum. Ung höfrungakýr, flaut dauð á sjónum með kálfinn úti. Ingólfur Júlíusson ljósmyndari var með í för og smellti af þessari mynd. Hann sagði að það hefðu verið áverkar á kúnni og í fyrstu hefði hann talið að hún hefði flækst í neti og drepist en við nánari skoðun virðast áverkarnir vera gamlir. Droplaug Ólafsdóttir líffræðingur hjá Hafró segir að þetta sé ekki óþekkt og áður hafi komið tilkynningar um dauðar höfrungakýr með kálfana hálfa úti.

Jóhanna Sigurðardóttir segist vonast til þess að heildarhagsmunum þjóðarinnar verði ekki teflt í tvísýnu þegar mál vegna dóma Hæstaréttar um gengislánin verði leidd til lykta. Enn og aftur sé verið að horfast í augu við alvarlegar veilur í eftirliti með fjármálafyrirtækjum í aðdraganda hrunsins. Þetta kom fram í umræðum á þinginu um dóma Hæstaréttar í gengislánamálunum. Ráðherrann sagði að stjórnvöld aðhafist ekki fyrr en dómstólar hafi skorið úr um óvissuþætti eins og vexti. Bjarni Benediktsson segir óheppilegt og óásættanlegt að það komi misvísandi skilaboð frá stjórnvöldum og fjármálafyrirtækjum um hvort bankarnir ráði við afleiðingarnar. 

Þröstur Helgason telur það brjálæðislega hugmynd að ráða einn versta stjórnmálamann Íslandssögunnar sem ritstjóra Morgunblaðsins. Í viðtali við Mannlíf ræðir hann samskiptin við ritstjórana Styrmi og Ólaf Stephensen og hnignun íslenskra fjölmiðla.

Borgarfulltrúar VG og Sjálfstæðisflokks mótmæltu harðlega á borgarráðsfundi í dag þeirri ráðstöfun að setja starfandi stjórnarformann yfir Orkuveituna. ,,Þetta er algjört einsdæmi og í miklu ósamræmi við það eftirlitshlutverk sem stjórnarformanni ber að sinna gagnvart stjórnendum fyrirtækisins, segir í bókun minnihlutans.  ,,Það vekur einnig furðu að á tímum hagræðingar og sparnaðar, skuli meirihlutinn ákveða að bæta við manni í annars fjölmenna yfirstjórn Orkuveitunnar sem fær þá greitt kr. 920.000,- mánaðarlega."

Fulltrúi VG telur ráðninguna hugsanlega stangast á við lög.

Arion banki og Íslandsbanki ráða við afleiðingar hæstaréttardóma um gengislánin. Berghildur Erla Bernharðsdóttir talsmaður Arion banka segir að þetta eigi við um öll þeu vaxtakjör sem hafa verið í umræðunni, hvort sem miðað verði við samningsvexti eða stýrivexti Seðlabankans.

Ragnheiður Ásta Pétursdóttir afhenti í morgun Ástu Ragnheiði Jóhannesdóttur forseta Alþingis stuðningsyfirlýsingu við nímenningana sem kærðir eru fyrir árás á Alþingi. Þar er þess krafist að málið verði látið niður falla, ella verði allir 700 sem undir skrifa ákærðir.

 Lánþegar hafa mátt þola nóg vegna framgöngu eigenda og stjórnenda bankanna í aðdraganda og kjölfar hrunsins - þó ekki eigi að bæta á herðar þeim þeirri kvöð að endurfjármagna fjármálastofnanir landsins að nýju, segir í sameiginlegri yfirlýsingu Hagsmunasamtaka heimilanna, Samtaka lánþega og talsmanns neytenda. Lýst er furðu á þeim ummælum seðlabankastjóra, að nauðsynlegt sé að breyta vaxtaákvæðum gengistryggðra lánasamninga svo eigendur bankanna þurfi ekki að leggja þeim til aukið fé.  Það á ekki að vera hlutverk lánþega að leggja einkafyrirtækjum til aukið rekstrarfé þegar hæfni stjórnenda þrýtur og rekstur stefnir niður á við.

Tugir manna sóttu um stöðu bæjarstjóra á Akureyri sem auglýst var laus til umsóknar, meðal þeirra tveir borgarfulltrúar Samfylkingarinnar í Reykjavík, Sigrún Elsa Smáradóttir borgarfulltrúi og Dofri Hermannsson varaborgarfulltrúi. Þau drógu sig í hlé frá borgarmálahópi Samfylkingarinnar á dögunum. Listinn yfir umsækjendur er afar skrautlegur en þar má finna fólk úr öllum helstu atvinnugreinum, poppara, fréttamenn, sjómenn, sjúkraþjálfara, nema, forstjóra svo eitthvað sé nefnt.

Már Guðmundsson seðlabankastjóri  segir að ef dómstólar komast að þeirri niðurstöðu að greiða beri gengislánin með samningsvöxtum hafi það mjög alvarlegar afleiðingar fyrir bankakerfið. Þegar frá líði valdi þetta samdrætti í hagkerfinu,  bankakerfið verði mun veikara og vextir verði þá einnig lægri en ella. Þar til dómstólar aflétti óvissunni og ásættanleg niðurstaða fáist sé hætt við því að hægt gangi að sigla íslenska hagkerfinu út úr keppunni. Þetta kom fram á blaðamannafundi í Seðlabankanum þar sem skýrt var frá ákvörðun um að lækka stýrivexti um 0.5 prósent. Vextirnir hefðu lækkað meira ef dómarnir hefðu ekki valdið óvissu.

Verðlag á innfluttum vörum hefur ýmist haldið áfram að hækka eða staðið í stað þrátt fyrir sterkari stöðu krónunnar, að því er fram kemur á vef ASÍ.

Verðlag á innfluttum vörum hefur ýmist haldið áfram að hækka eða staðið í stað þrátt fyrir sterkari stöðu krónunnar, að því er fram kemur á vef ASÍ.

,,Anne Marie var sterkur foringi en um leið mikill vinur mannsins á götunni og vildi heldur vera á vettvangi en á bak við skrifborð,” sagði séra María Ágústsdóttir í minningarorðum sínum í Dómkirkjunni um Anne Marie Reinholdtsen yfirforingja Hjálpræðishersins á Íslandi sem fórst á vofveiflegan hátt í mótorhjólaslysi á dögunum. Hjólamenn fjölmenntu í erfidrykkjuna sem og fólkið á hernum. Þá mátti sjá ýmsa þekkta götumenn og konur enda var Anne Marie stofnandi Dagsetursins. Anna Marie sem varð sextug á þessu ári var líka einn stofnenda Bifhjólasamtaka Hjálpræðishersins, Salvation Army Riders.

Stuðningsyfirlýsing til handa nímenningunum sem kærðir eru fyrir árás á Alþingi verður afhent forseta Alþingis á fimmtudagsmorgun. Um 700 manns hafa skrifað undir yfirlýsinguna sem Ragnheiður Ásta Pétursdóttir fyrrverandi þula mun afhenda Ástu Ragnheiði Jóhannesdóttur forseta þingsins áskorunina.

Leiðrétting á lánum sveitarfélagsins Álftaness frá árunum 2005 og 2006 sem voru bundin við gengi erlendrar myntar gæti numið áttahundruð milljónum króna og jafnframt hefur gengishrunið hækkað leigusamninga um tugmilljónir árlega. Bæjarfulltrúi Á-listans vill að bærinn feli lögmanni að kanna réttarstöðu sveitarfélagsins vegna gengistryggðra lána sem tekin voru á árunum 2005 og 2006 og í framhaldi að gera kröfu um endurgreiðslu og leiðréttingar lánadrottna.

Birgitta Jónsdóttir verður í viðtali á CNN í kvöld að ræða um áætlanir um að skapa Íslandi sérstöðu varðandi tjáningafrelsi, málfrelsi og upplýsingafrelsi – eða nokkurs konar fjölmiðlaparadís, þar sem lögmálum um upplýsingaleynd skattaparadísanna er snúið á hvolf.

,,Það verður ekki þannig til lengdar að menn bendi hver á annan, segir Gylfi Magnússon viðskiptaráðherra en í máli hans eftir ríkisstjórnarfund í dag kom fram að ríkisstjórnin myndi ekki skera úr þeim réttarágreiningi sem væri uppi varðandi  gengislánin eftir dóma Hæstaréttar. Ríkisstjórnin gæti hlutast til um lausn málsins. Hún myndi hinsvegar ekki grípa fram fyrir hendurnar á fjármálastofnunum og dómstólar yrðu að skera úr um hvaða vaxtakjör hæfðu lánunum.

Til að koma í veg fyrir að „hættulegir“ læknar séu að störfum, hafa norrænu heilbrigðisráðherrarnir ákveðið að greiða fyrir aðgangi að upplýsingum um fyrri starfsemi lækna sem sækja um læknisleyfi í öðru norrænu ríki. Hingað til hafa löndin ekki miðlað upplýsingum reglulega um gagnrýni og aukið eftirlit, heimildir, rekstrarhömlur og annað sem varðar læknisþjónustu.

,Fyrirhugaðar fjárfrekar framkvæmdir á vegum hins opinbera, meðal annars heilbrigðiskerfisins, skjóta skökku við þegar ekki virðist vera hægt að reka það sem fyrir er í óbreyttri mynd,“ segir í ályktun frá Félagi ráðgjafa og stuðningsfulltrúa. Félagið ætlar ekki taka því þegjandi ef til stendur að ganga frekar á kjör heilbrigðisstarfsfólks en orðið er.

Ross Beaty eigandi Magma Energy tjáir sig um Kínverja í netmiðlinum Stockhouse í janúar og segist vilja eiga auðlindir í jarðvarma næstu tuttugu árin vegna áhuga Kínverja á að eignast þær

Lára Hanna Einarsdóttir bendir á þetta á bloggi sínu og segist hafa spáð því í ágúst í fyrra að Ross Beaty væri ekki að kaupa HS Orku til að vera á Íslandi heldur til að braska með fyrirtækið. Hún segir að Ross Beaty ætti að gleðjast í ljósi áhuga Kínverja á Íslandi og samninga við íslensk stjórnvöld og fyrirtæki.

Marinó G. Njálsson hjá Hagsmunasamtökum heimilanna segir allar forsendur hafa brugðist vegna verðtryggðra  lána og vísar til þess að bæði Reykjavíkurborg og Orkuveita Reykjavíkur hafi viðurkennt þennan forsendubrest  í samningum við verktaka og bætt þeim hann. Þá segir Marinó að markaðsmisnotkun fjármálafyrirtækja og stöðutakan gegn krónunni hafi átt ríkan þátt í að halda uppi verðbólgu og breyta þeim forsendum sem lántakendur lögðu upp með í viðskiptum sínum við bankanna. Hann er hissa á að dómsmál vegna verðtryggðu lánanna séu fyrst að koma fram núna.

Ólína Þorvarðardóttir þingmaður Samfylkingarinnar segir ekki sjálfgefið að ríkisvaldið eigi að grípa inn í eða reyna að hafa áhrif á þá stöðu sem komin sé upp í kjölfar dóma hæstaréttar um gengislánin. ,,Það eru lög í landinu og nú reynir á þau,“ segir Ólína. ,,Það kann þó að verða of sársaukafullt ef fjöldi Íslendinga þarf að leita til dómstóla meðan þessi óvissa er uppi.“

Viðskiptanefnd og Efnahags og skattanefnd þingsins hittu fulltrúa Seðlabankans og Fjármálaeftirlitsins á fundi í morgun.

Wilter Nyabate flytur fyrirlestur um mannréttindi í Norræna húsinu í dag þar sem hún mun fjalla um mannréttindabaráttu sína í Kíbera í Naíróbí, Kenýa. Nyabate er einn liðsmanna í Stand Up United, liði ellefu baráttumanna sem Amnesty International hefur sett saman og ver mannréttindi í veröldinni.

Kostnaður Finnmerkurfylkis vegna fundarferðar til í Brussel í júní nam um 15.000 norskum krónur á mann, (300 þúsund íslenskum) en fjórtán voru sendir á fund um Barentsmálefni frá Finnmörku. Fundurinn stóð í hálftíma og reiknast Finnmerkingum til að hver mínúta hafi því verið afar dýr.
Norski stjórnmálamaðurinn Mona Jensen, frá Sósíalíska Vinstri flokknum í Vardø,  gerdi grein fyrir kostnaðinum á fylkisþinginu í Kautókeinó í fyrradag, og var hvorki sátt vid tilkostnað fylkisins, né árangur fundarins.

Lilja Mósesdóttir  segir að dómar Hæstaréttar í gengislánamálunum komi til með auka ójafnræði milli skuldara og ýta undir óánægju og reiði. Í stað þess að það sé tekið heildstætt á skuldavanda heimilanna fái nú hluti skuldara meiri afslátt af skuldum sínum en kreppan gefi tilefni til. Hinir fái ekki neitt. Hún segist harma það að fólki sé mismunað eftir því hvaða banka það átti viðskipti við, hvað standi í lánasamningum og hvort lánið var bundið við erlenda mynt eða verðtryggt. ,,Stjórnvöld hefðu ekki átt að hvetja til þess að fólk færi í dómsmál á einstaklingsgrunni gegn lánastofnunum heldur taka af skarið og finna lausn í anda jafnræðis, það hefði verið mun farsælla fyrir alla.“

Hæstiréttur hefur vísað frá kröfu Höllu Gunnarsdóttur blaðamanns um opið þinghald í máli ellefu manna sem eru ákærðir fyrir kaup á vændi.

Halla kærði ákvörðun Héraðsdóms um að hafa þinghaldið lokað til Hæstaréttar  en Hæstiréttur hefur nú vísað málinu frá á þeim forsendum að hún eigi ekki lögvarða hagsmuni.

Hæstiréttur klofnaði í málinu, Jón Steinar Gunnlaugsson og Viðar Már Matthíasson kváðu upp úrskurðinn en Hjördís Hákonardóttir hæstaréttardómari skilaði séráliti og taldi að Hæstiréttur ætti að taka afstöðu til málsins.

Íslendingar fjölmenntu á fund um íslensku kreppuna í Kristjánsborgarhöll í dag, en helsti gesturinn var Diana Wallis. einn af höfundum bókar sem miðjuflokkarnir á Norðurlöndum gefa út og nefnist einfaldlega Kreppa. Diana sagði staðfestingu á aðildarviðræðum góða gjöf til Íslendinga á þjóðhátíðardaginn.

Hæstiréttur Íslands hefur kveðið upp þann dóm að Lýsingu hf. og SP-fjármögnun hafi verið óheimilt að binda lán í íslenskum krónum við gengi erlendra gjaldmiðla.

Mikill titringur hefur verið vegna málsins innan bankakerfisins Bæði Gylfi Magnússon viðskiptaráðherra og Steingrímur J. Sigfússon fjármálaráðherra segja dóminn stórfréttir fyrir bankakerfið en reynt hafi verið að undirbúa málið með tilliti til þess að dómur gæti fallið á hvorn veginn sem er.

Sofi Oksanen handhafi bókmenntaverðlauna Norðurlandaráðs hefur verið rekin frá forlaginu sem gefur út bækur hennar. Hún fékk tilkynningu um þetta í tölvupósti en ástæðan sem gefin er upp er trúnaðarbrestur. Sofi Oksanen hefur gagnrýnt forlagið fyrir það hvernig það hagar markaðsstarfi sínu og fyrir að gera lítið úr skoðunum höfunda sinna.

Agnes Arnardóttir segist vera venjulegur Íslendingur sem Landsbankinn sé að reyna að kúga í gjaldþrot. Í aðsendri grein í dag hvetur hún skuldara til að lýsa sig gjaldþrota í stórum hópum, stærri hópum en bankakerfið ræður við.

,,Ég sjálf er búin að vera í marga mánuði að reyna að ná einhverju vitrænu samkomulagi við minn banka, ríkisbankann Landsbanka Ísland, skrifar Agnes.,, Nú stend ég frammi fyrir því að láta kúga mig í þrot eða taka til minna ráða."

Einar K,. Guðfinnsson fagnar því að Þjóðverjar leggi stein í götu ESB aðildar  Íslands og sýni þar með sitt rétta andlit." Staðgengill þýska sendiherrrans gerði íslenskum stjórnvöldum grein fyrir því í gær að Þjóðverjar styddu umsókn Íslendinga um aðild að ESB en lýsti því samtímis yfir að Íslendingar yrði að taka sig varðandi hvalveiðar. ,,Þetta er álíka gáfulegt og við færum í aðildarviðræður á þeim forsendum að Þjóðverjar hættu að framleiða bíla."

Samþykkt var á Alþingi í nótt þingsályktunartillaga um að Ísland skapi sér sérstöðu meðal þjóða og verði nokkurs konar fríríki upplýsinga. Skerpt verður á lögum um tjáningarfrelsi og upplýsingafrelsi. Tillagan var samþykkt með 50 greiddum atkvæðum en einn sat hjá.

8000 manns skráðu sig í facebook-grúppuna "Vatnið er eign okkar allra!" á tveimur og hálfum sólarhring. Meðlimir hópsins krefjast þess að allt, ALLT, verði gert til þess að Vatnalögin frá 2006 taki ekki gildi og að vatn landsins verði áfram í eigu almennings.

Þurfa Íslendingar að borga fyrir rigninguna í framtíðinni eins og Bólivíumenn. Því veltir Jakobína Ingunn Ólafsdóttir fyrir sér í aðsendri grein og segir: „Postular nýfrjálshyggjunar munu bera við einhverri nýfrjálshyggjukenningu til þess að réttlæta að útvaldir einkaaðilar græði á því að fólk fái sér vatnssopa.”

Þingfundi á Alþingi lauk klukkan kortér yfir sex í morgun. Sátt er um að ljúka þingstörfum í dag og hefst þingfundur aftur klukkan 11. Jóhanna Sigurðardóttir forsætisráðherra mælir þar frumvarpi um sameiningu ráðuneyta. Sátt er um að afgreiða það í nefnd en það bíður síðan haustsins. Alþingi kemur svo aftur saman einn dag í næstu viku til að ljúka afgreiðslu svokallaðs heimilispakka, sem felur í sér aðgerðir í þágu heimila.

Jón Gnarr tók við borgarstjóraembætti í Reykjavík fyrir stundu. Hann sagðist hafa gert margt skemmtilegt um ævina en ekkert kæmist í hálfkvisti við Besta Flokkinn. Hann sagði að kennarinn sinn í barnaskóla hefði sagt sér að hann kæmist aldrei langt á fíflagangi. Það hefði reynst rangt. Hann væri nú borgarstjórinn í Reykjavík. Hanna Birna Kristjánsdóttir verður forseti borgarstjórnar þrátt fyrir varnaðarorð ritstjóra Morgunblaðsins sem taldi að hún  yrði verktaki til að koma drykkjuhrútum á herðablöðunum úr móttökum í Höfða og halda uppi aga á borgarstjórnarfundum.

Jóhanna Sigurðardóttir forsætisráðherra segir afstöðu sína til almennra afskrifta skulda óbreytta enda yrði það afar dýr aðgerð fyrir Íbúðalánasjóð. Jóhanna segir að miklu skynsamlegra sé að finna leið að greiðsluaðlögun sem gagnast þeim sem verst eru settir í skuldabaslinu og býður upp á hærri afskriftir þar sem þörfin er mest

Helgi Hjörvar samflokksmaður Jóhönnu vill nýta svigrúm vegna samninga við Seðlabankann í Lúxemburg, um eitthundrað milljarða króna, til afskrifta á lánum Lífeyrissjóðanna  Þá vill hann almennar niðurfellingar af lánum Íbúðalánasjóðs og segir að án almennra aðgerða sé einkum komið til móts við þá sem hafi stofnað til mestra skulda.

Hvaða þýðingu hefur efnahagskreppan fyrir samband Íslands við önnur Norðurlönd og Evrópusambandið? Þetta er meðal þess sem Diana Wallis varaformaður Evrópuþingsins ætlar að ræða á umræðufundi um málefni Ísland í Kristjánsborg, danska þjóðþinginu á fimmtudag. Diana er búin að skrifa bók um Icesave-málið sem nefnist einfaldlega Kreppa.

Gæti svipað mengunarslys orðið á Drekasvæðinu ef þar yrði borað fyrir olíu og átt hefur sér stað á Mexíkóflóa? Þessu veltir Hjörleifur Guttormsson upp í grein hér á Smugunni og rifjar upp hvernig Kolbrún Halldórsdóttir, þáverandi umhverfisráðherra, var harðlega gagnrýnd fyrir að benda á hættuna, meira að segja af eigin flokki.

Þingmenn ræddu þingstörfin undir dagskráliðnum fundarstjórn forseta við upphaf þingfundar í morgun. Bjarni Benediktsson Sjálfstæðisflokki sagði óþarft að nota dýrmæta lokadaga þingsins í til að mynda vatnalögin, gildistöku þeirra væri hægt að fresta. Hann sagði ennfremur að það væri fullkomið glapræði að henda lögunum í ruslatunnuna út af ágreiningi um eitt atriði.

Nær útilokað er að breytingar á stjórnráðinu verði afgreiddar á þessu þingi en frumvarpið sem kveður á um fækkun ráðuneyta úr tólf í níu  var samþykkt í þingflokkum stjórnarflokkanna fyrir helgi.

Samkomulag um þinglok liggur ekki fyrir en stefnt er að því að þingið ljúki störfum á morgun. Þá er næsta öruggt að frumvarp sem fellir úr gildi vatnalögin frá 2006 verður látið bíða og gildistökunni verður frestað eitthvað áfram. Hvorugt þessara mála er á dagskrá þeirra þingfunda sem eru fyrirhugaðir í dag en í kvöld verða svo almennar stjórnmálaumræður á Alþingi.

Í nýlegri úttekt á umfjöllun fjölmiðla í aðdraganda síðustu sveitastjórnakosninga kom í ljós að dagblöð og ljósvakamiðlar fjölluðu mest um Sjálfstæðisflokkinn af þeim stjórnmálaflokkum sem buðu fram til borgarstjórnarkosninga.Skoðun fjölmiðlagreiningarþjónustunnar Vaktarans leiðir hinsvegar í ljós að þetta var aðeins lítill hluti af heildarumfjöllun um kosningarnar. Mesta umræðan var á netinu og þar var Besti flokkurinn umtalaðasti flokkurinn.

Besti flokkurinn er því að mati Vaktarans ótvíræður sigurvegari umræðunnar sem og kosninganna.

,,Vitleysisgangur undanfarinna ára er vonandi á undanhaldi því við höfum hreinlega ekki efni á því að skuldsett eða illa rekin fyrirtæki velti kostnaði út í verðlagið," skrifar Brynhildur Pétursdóttir lögfræðingur hjá Neytendasamtökunum á heimasíðu samtakanna og bendir á að furðu margar verslanir séu með opið allan sólarhringinn og það sé látið eins og þetta sé háværasta krafa neytenda.  ,,Kannski var einhver forsenda fyrir þessum opnunartíma í uppgangi síðustu ára en ég stórefast um að hún sé enn til staðar."

,,Það er mjög alvarlegt mál ef ferðamenn þora ekki inn á svæðið þar sem þeir óttast skaða og kostnað,“ segir Ólöf Ýrr Atladóttir ferðamálastjóri  en bílaleigur vara ferðamenn við að ferðast um á stóru svæði  umhverfis gosstöðvarnar í Eyjafjallajökli. Sagt er að askan geti skemmt lakk bílsins og ferðamennirnir þurfi að kosta upp á viðgerð.

Ný umhverfisvæn aðferð við greftrun sem nefnist þurrfrysting hefur vakið athygli Dóms- og kirkjumálaráðuneytisins. Enn sem komið er hefur aðferðin ekki náð almennri útbreiðslu en tilraunir standa yfir í Kanada og Svíþjóð. Líkin eru fryst niður í -18 gráður og þvínæst sökkt í fljótandi köfnunarefni og hrist, þar til þau verða nánast að dufti. Amalgam og aðrir málmar eru sigtaðir frá með sérstakri aðferð og duftið er að lokum jarðsett í kistu úr maís eða kartöflusterkju.

„Einu myndi gilda þótt fyrir lægi að málamiðlun fæli í sér aukna hvalavernd og minni hvalveiðar en ella. Mörg þessara samtaka eru öfgafull, stjórnast af peningalegum hagsmunum og þrífast á deilu áðurnefndra ríkja og ófriði innan ráðsins,“ segir Tómas H. Heiðar fulltrúi Íslands í Hvalveiðiráðinu við Morgunblaðið í morgun.  Formaður Náttúruverndarsamtaka Íslands er æfareiður yfir ummælunum en Tómas er talsmaður sjávarútvegsráðherra í málum sem varða hvalveiðar. Árni Finnsson  segir svona skítkast  flokki ráðherrans til skammar.”

Alþingi samþykkti í dag frumvarp um breytingar á hjúskaparlögum með öllum greiddum atkvæðum. Ein og sömu hjúskaparlög taka samkvæmt frumvarpinu  bæði til gagnkynhneigðra og samkynhneigðra en í dag gilda þau eingöngu um hjónaband karls og konu. Lögin öðlast gildi 27. júní en það er alþjóðlegur baráttudagur samkynhneigðra. Prestar geta eftir sem áður neitað að gifta einstaklinga af sama kyni stríði það gegn trúarsannfæringu þeirra.

Þinglok verða fyrir þjóðhátíðardaginn 17. júní  ef allt fer að óskum, segir Steingrímur J. Sigfússon en hann reiknar með að fyrir þann tíma verði ákvarðanir um stjórnlagaþing afgreiddar úr þinginu. Hann telur samstöðu í sjónmáli á milli flokkana.

Össur Skarphéðinsson segir vatnalögin frá 2006 illræmd og vitlaus, þar hafi verið reynt að slá einkaeignarétti á allt vatn í landinu. Bjarni Benediktsson óttast eignaupptöku verði lögin afnumin og segir að menn eigi að halda sig við lögin nema ríkisstjórnin sé að boða algera þjóðnýtingu.. Frumvarp um afnám vatnalaga var afgreitt úr Iðnaðarnefnd í morgun gegn atkvæðum Sjálfstæðismanna og framsóknarmanna. Verði vatnalögin ekki afnumin nú á síðustu dögum þingsins taka þau gildi fyrsta júlí.

 Danskt dagblað hefur bent á villu í prófi sem lagt er fyrir umsækjendur um danskan ríkisborgararétt. Við spurningu um Norðurlandaráð eru þrír rangir svarmöguleikar en enginn réttur. Neyðarlegt að mati margra stjórnmálamanna en fjölmiðlar hafa rætt við innflytjendur sem hafa fallið á prófinu vegna einnar villu.

,,Brúðarkjóllinn liggur í hrúgu á stól á flugvellinum. Brúðurin verðandi situr við hliðina á honum á óþægilegum stól, ósofin. Brúðguminn er svangur. Ég sjálf er glorsoltin, þyrst og þreytt. Við erum stödd í leikhúsi fáranleikans og Iceland Express er um það bil að missa allt niður um sig.“ Þannig lýsir Sigríður Víðis Jónsdóttir fjórtán tíma seinkunn vélar félagsins frá New York. Farþegar fengu hvorki vott né þurrt í tólf tíma í köldu aflokuðu rými og lengst af engar skýringar heldur.

Þingmenn rifust í klukkutíma um styrkjamál í upphafi þingfundar í dag og var forseti hvattur af þingmönnum Sjálfstæðisflokksins til að víta Björn Val Gíslason VG sem vildi vita hvort Sigurður Kári Kristjánsson hefði þegið greiðslur frá erlendri lögfræðistofu sem hefði verið fengin til ráðgjafar þinginu fyrir atbeina Sjálfstæðisflokksins. Þórunni Sveinbjarnardóttir Samfylkingu var svo mikið niðri fyrir í umræðunni að hún kallaði Árna Þór Sigurðsson sem sat á forsetastóli, frú forseta, fjórum sinnum

Hirtingin er algjör á samstarfsflokknum. Þetta er pólitísk hýðing; og það ofan á allt annað sem á undan er gengið, segir Einar K. Guðfinnsson, þingmaður Sjálfstæðisflokksins um frumvarp forsætisráðherra um fækkun ráðuneyta úr tólf í níu sem var lagt fram á Alþingi í gær. Þórunn Sveinbjarnardóttir Samfylkingu kallaði Einar, tilsjónarmann með sálarheill þíngflokks Vinstri grænna í umræðum á Alþingi í dag.

Julian Assange, stofnandi WikiLeaks, notaði hús á Grettisgötunni sem höfuðstöðvar þegar WikiLeaks vann að því að koma myndefni frá Írak í sýningarhæft ástand. Í ítarlegri grein í The New Yorker er þessi saga rakin sem og bakgrunnur Assange, eins virkasta hakkara veraldar.

Sjúkraliðar segja að félagsmálaráðherra sé að lýsa yfir stríði við kvennastéttir með hugmyndum sínum um að frysta laun opinberra starfsmanna í þrjú ár,,Á meðan hægri hönd félagsmálaráðherra skrifar upp á að farið sé í byggingu stórhýsa, meðal annars byggingu nýs sjúkrahúss og hjúkrunarheimila og skapa með því hefðbundin karlastörf , skrifar sú vinstri undir yfirlýsingu um að  konur í opinberum störfum, þar á meðal sjúkraliðar, greiði það með frystingu launa og gríðarlegri kjaraskerðingu. Ekki leggst nú mikið fyrir kappann .“

Lið þjóðþekktra Íslendinga mætir Íþróttafélaginu Styrmi í fótboltaleik á sunnudaginn til stuðnings mannréttindum. „Fótboltinn á að sameina en ekki sundra,“ segir Halla Gunnarsdóttir, fyrirliði þessa nýja liðs – sem hún fullyrðir að geymi framtíðarlandsliðskonu.

Kostnaður hvers Íslendings vegna 345 milljarða sem Seðlabankinn tapaði vegna lána til gömlu bankana nemur 551 þúsundi.  Kostnaður hvers Íslendings vegna eiginfjárframlags ríkisins og víkjandi lána til nýju bankanna, Arion banka, NBI og Íslandsbanka nemur um 617 þúsundum fyrir hvern Íslending.

Erlendar skuldir þjóðarbúsins voru rúmlega 600% af vergri landsframleiðslu fyrir hrun bankanna en standa nú í um 300% af vergri landsframleiðslu og eiga eftir að lækka enn meira þegar frekari afskriftir skulda eiga sér stað.

Gylfi Arnbjörnsson segir að það komi ekki til greina að ríkisfyrirtækið Landsvirkjun fái að flytja inn vinnuafl utan EES svæðisins vegna hugsanlegra framkvæmda við Búðarhálsvirkjun, Stefán Pálsson sagnfræðingur segir að viljayfirlýsing Landsvirkjunar, kínversks banka og verktakafyrirtækis þýði væntanlega að Kínverjar reddi pening í næstu stórframkvæmdir ef tryggt sé að þeir fái verkið. Hann rifjar upp aðdraganda Ljósafossvirkjunar fyrir 75 árum sem hann segir af sama toga.

Amnesty International leggur í nýrri skýrslu áherslu á að ríki heims hafi mannréttindi í huga um leið og þau framfylgja Þúsaldarmarkmiðum Sameinuðu þjóðanna, en þau markmið snúast um að berjast gegn fátækt í heiminum. Samtökin telja Þúsaldarmarkmiðin ganga mun skemur en gildandi mannréttindasáttmálar.

Áfram með smjörlíkið! er yfirskrift þriggja sýninga sem þau Hlynur Hallsson og Jóna Hlíf Halldórsdóttir standa að saman í Reykjavík, Djúpavík og Berlín. Þær bera hver sinn undirtitil, Innantóm slagorð,  „... og tilbiður guð sinn sem deyr.“ Og Byltingin er rétt að byrja.

Félagið Vantrú hefur kvartað við Háskóla Íslands og sakar guðfræðikennara um áróður og óhróður gegn félaginu og trúleysingjum í tímum í guðfræði- og trúarbragðadeild. Erindið hefur velkst um í kerfinu nokkuð lengi og óljóst er um niðurstöðu. Siðanefnd Háskólans reyndi sættir í málinu en sáttatillagan var felld á kennarafundi guðfræði- og trúarbragðadeildar.

Gunnar Skúli Ármannsson læknir hvetur þingmenn til að hraða afgreiðslu frumvarps sem fellir vatnalögin frá 2006 úr gildi. Frumvarpið á eftir aðra og þriðju umræðu en þrjár vikur eru eftir af þingi. Verði frumvarpið ekki afgreitt fyrir þinglok taka lögin frá 2006 gildi sem skilgreina vatn sem einkaeign. Gömlu lögin frá 1923 sem enn eru í gildi skilgreina hinsvegar vatnið sem eign almennings nema annað sé ákveðið.

Sjálfstæðisflokkurinn endurgreiðir ofurstyrkina frá FL Group og Landsbankanum á sjö árum en fyrsta greiðslan hefur þegar verið innt af hendi. Þetta kom fram í máli Bjarna Benediktssonar formanns Sjálfstæðisflokksins  á Alþingi  í svari við fyrirspurn í umræðum um störf þingsins frá Birni Vali Gíslasyni þingmanni VG. Björn Valur spurði ennfremur hver tæki við greiðslum í ljósi stöðu þessara fyrirtækja en því var ekki svarað.

Arndís Soffía Sigurðardóttir ferðaþjónustubóndi í Fljótshlíð  segir bílaleigur beina fólki frá ferðamannastöðum í nágrenni gostöðvanna þar sem tryggingafélögin tryggi ekki skemmdir á lakki vegna ösku. Það sama eigi við um fyrirtæki sem leigi fellihýsi og hjólhýsi. Það sé óásættanlegt ef allir eigi að leggjast á eitt til að bjarga sumrinu í ferðaþjónustu. Hún segir neikvæðan fréttaflutning af öskufjúki fæla Íslendinga frá ferðalögum í nágrenni gosstöðvanna. Þá segir hún þögnina um eldgosið í nýju myndbandi Iðnaðarráðuneytisins, vera æpandi.

Árni Stefán Jónsson varaformaður BSRB segir hugmyndir Árna Páls Árnasonar félagsmálaráðherra um að frysta laun opinberra starfsmanna í þrjú ár óttalegt gaspur. Árni Páll segir í grein í Fréttablaðinu í dag að engin innistæða sé fyrir kauphækkunum hjá hinu opinbera næstu þrjú árin. Kauphækkanir myndu einfaldlega kalla á fækkun starfa. ,,Kemur ekki til greina," segir Árni Stefán.

Alþingi hefur samþykkt frumvarp sem veitir Iðnaðarráðherra heimild til að semja um byggingu gagnavers Verne Holding í Reykjanesbæ en einn eigenda félagsins er Novator, félag í eigu Björgólfs Thors Björgólfssonar. 36 þingmenn greiddu frumvarpinu atkvæði sitt, fimm voru á móti, Margrét Tryggvadóttir, Vigdís Hauksdóttir, Birgitta Jónsdóttir, Þór Saari og Þráinn Bertelsson og sjö sátu hjá.

Nokkrar tegundir ísbjarna eru í útrýmingarhættu vegna loftslagsbreytinga og hlýnunar á norðlægum slóðum. Ahrif loftslagsbreytinga á hegðun, atferli og afkomu ísbjarna hafa nú verið rannsakaðar. Niðurstöðurnar leiða í ljós versnandi lífsskilyrði ísbjarna og bendir margt til þess að nokkrir stofnar hverfi alvegi, af því að íslausi tíminn lengist og erfiðara er að afla fæðu. Flestum Íslendingum er í fersku minni ástandið á ísbjörnunum sem komu á land hér um árið, en þeir voru einmitt svangir, magrir og illa til reika.

„Mér veitist sá heiður að kynna næsta borgarstjóra í Reykjavík: Jón Gnarr.“ Þetta tilkynnti Dagur B. Eggertsson fjölmiðlamönnum á þaki blokkar Æsufelli 4 í Breiðholti í dag. Málefnasamningur er enn í vinnslu, en flokkarnir fullyrða að þeir muni ekki steyta á neinu skeri sem valdið geti því að þessi meirihliti verði ekki til.

Dofri Hermannsson gagnrýnir harðlega málflutning Bandaríkjamannsins Bill Still, sem í viðtali hér á Smugunni um daginn lagði til að Íslendingar myndu prenta nýja peninga, jafnvel þótt það myndi þýða einangrun frá umheiminum í nokkur ár.

Helga Þórðardóttir, oddviti Frjálslynda flokksins, skrifar Jóni Gnarr, borgarstjóraefni Besta flokksins, opið bréf hér á Smugunni í dag þar sem hún hvetur hann að selja aldrei Orkuveitu Reykjavíkur ef hann verður borgarstjóri.

Reiknað er með að málefnavinnu fyrir væntanlegan meirihluta Samfylkingar og VG í Hafnarfirði ljúki fyrir helgi, enn á þó alveg eftir að ræða bæjarstjóra og aðra verkaskiptingu í bænum.

Ólafur Þór Gunnarsson oddviti VG í Kópavogi reiknar með að verkaskipting í bæjarstjórn Kópavogs, þar á meðal staða bæjarstjóra, verði endanlega ákveðinn á fundi í kvöld. Þessi verkaskipting og málefnasamningur flokkanna verður svo kynntur öðrum hvorum megin við helgina.

Auglýst verður eftir nýjum bæjarstjóra á Akureyri um helgina. Umsækjendur hafa tíma fram í miðjan júní til að senda inn umsókn en Oddur Helgi Halldórsson hjá L-lista reiknar ekki með að fleiri störf á vegum Akureyrarbæjar verði auglýst á næstunni.

Hallgrímur Helgason lýsir frægri heimsókn til Davíðs Oddssonar í nýrri grein í Tímariti Máls og menningar sem kallast „Draugur Group: Minningarorð frá Baugspenna“, og gerir einnig upp við þetta einkennilega stríð Sjálfstæðisflokksins við auðhring og hvernig hans þáttur í því var.

Bill Still hefur róttækar hugmyndir um hvernig leysa megi heimskreppuna. Hann telur að gera eigi ólöglegt að ríkissjóðir skuldi peninga, telur hverju ríki frjálst að prenta peninga og varar Íslendinga við að ganga í Evrópusambandið.

,,Sóley hefur með málflutningi um jafnrétti verið að fylgja eftir stefnu Vinstri hreyfingarinnar græns framboðs í kvenfrelsismálum, en ekki á einka flippi eins og halda mætti,“  skrifar Tómas Jónsson sem faðir Sóleyjar Tómasdóttur í grein á Smugunni og svarar Þorleifi Gunnlaugssyni sem sagði í Morgunblaðinu að margir kjósendur hefðu sett femínisma Sóleyjar fyrir sig.  Jón Torfason segir að einhliða málflutningur femínista geri lítið til að byggja upp traust á flokknum. Halla Gunnarsdóttir talskona femínistafélagsins segir stuðningsmenn Þorleifs hafa notað Fésbók til að níða skóinn af Sóleyju.

Í dag er í fyrsta skipti þingfest mál fyrir héraðsdómi yfir vændiskaupendum en lög sem banna kaup á vændi tóku gildi í fyrra. Um ellefu karlar eru ákærðir og hefur dómarinn, Arngrímur Ísberg, kveðið á um að réttarhaldið fari fram fyrir luktum dyrum. Hann mun úrskurða um það formlega í dag.

Meirihluti utanríkismálanefndar ályktar að fela utanríkisráðherra, í samráði við utanríkismálanefnd, að skipuleggja ferð til Gaza svæðisins og að Ísland standi að því að senda hjálpargögn til að aðstoða heimamenn og sýna þannig andstöðu við herkvína sem Ísraelsmenn hafa sett á Gaza í trássi við alþjóðalög. Allir flokkar nema Sjálfstæðisflokkurinn standa að áliti meirihlutans.

,,Þessir atburðir kalla á hörð viðbrögð og Ísland á að vera þar í fararbroddi,“ segir Steingrímur J. Sigfússon fjármálaráðherra en ríkisstjórnin ræddi mögulegar þvingunaraðgerðir gagnvart Ísrael í morgun í kjölfar þess að skotið var á skipalest sem flutti hjálpargögn til Gaza. Össur Skarphéðinsson. utanríkisráðherra segir  að PLO hvetji ekki til þess á þessu stigi að Evrópuríki slíti stjórnmálasambandi við Ísrael eða setji á viðskiptabann.

Ögmundur Jónasson settur formaður Utanríkismálanefndar Alþingis segist persónulega á þeirri skoðun að það sé löngu tímabært að slíta stjórnmálasambandi við Ísrael. Það sé hinsvegar verkefnið núna að ná þverpólitíkri samstöðu um með hvaða hætti rödd Íslands heyrist sem best. Stjórnmálaslit séu ekki markmið heldur tæki til að hafa áhrif. Ef hægt sé  að gera það með öðrum hætti sé hann tilbúinn að hlusta á þau sjónarmið. Utanríkismálanefnd fundar með utanríkisráðherra í hádeginu.