Skotgrafir sannleikans
Í lok október í fyrra tjáðu grátandi og úttaugaðir embættismenn þjóðinni að hún ætti að búa sig undir verstu tíðindi í sögunni. Sannleiksskýrsla Alþingis væri með því móti að enginn kæmist heill á sálinni frá gerð hennar og fólk þyrfti jafnvel að vera frá vinnu um tíma til að melta boðskapinn.
Þjóðin stóð á öndinni yfir þessum uppljóstrunum, en vegna alvöru málsins var skýrslunni, sem átti að vera tilbúin fyrsta nóvember, frestað til fyrsta febrúar. Síðan þá hefur henni aftur og aftur verið frestað og nú er svo komið að nefndin neitar að upplýsa um útgáfudag. Kannski næsta föstudag, sagði einhversstaðar.
Það er ódýrt að ráðast að nefndarmönnum fyrir þennan seinagang. Miklu nær er að áætla að það hafi verið gersamlega óraunhæft að ætla slíkri rannsókn bara átta mánuði. Skýrslan telur 2000 blaðsíður en til viðbótar er skýrsla siðanefndar upp á 500 síður. Það hefði verið heppilegra að ætla nefndinni meiri tíma strax í upphafi. Með hverjum deginum sem líður frá því að skýrslan átti að koma út minnkar áhrifavald sannleiksnefndarinnar og áhuginn á innihaldi sannleiksskýrslunnar dofnar. Tiltrú á stjórnmálamönnum er afar lítil fyrir og ekki eykst hún við þennan vandræðagang.
Málum sem varða banka- og embættismenn í skýrslunni verður vísað til sérstaks saksóknara ef grunur er um að þeir hafi brotið af sér. Ef embættismenn eru grunaðir um mistök, sem ekki varða við hegningarlög, verður þeirra málum vísað til viðkomandi ráðherra.
Í janúar var hinsvegar skipuð nefnd þingmanna til að bregðast við þeim ávirðingum sem fram kæmu á ráðherra í skýrslunni með tilliti til ráðherraábyrgðar. Nefndin leggur fram þingsályktunartillögu telji hún upplýsingar í skýrslunni gefa ástæðu til þess en tillagan er þá ákæra fyrir Landsdómi. Sú nefnd hefur nú beðið og beðið en hún fær skýrsluna í hendur um leið og aðrir.
Rannsóknin á aðdraganda bankahrunsins er ekki venjulegt sakamál heldur pólitískt uppgjör. Stefán Ólafsson prófessor segir í viðtali á Smugunni að stjórnmálamenn séu meiri ógn við samfélagið en efnahagskreppan. Það má til sanns vegar færa. Það reynir á stjórnmálastéttina þegar nefnd þingmanna úr öllum flokkum fær skýrsluna í hendur til að ákveða hvernig haldið verði á málum gagnvart ráðherrum. Það er auðvelt að sýna einhug núna en sporin í IceSave málinu hræða. Þegar þingmennirnir fá í hendurnar nöfn og kennitölur þeirra sem hafa gerst brotlegir í aðdraganda hrunsins er hætt við að að þeir taki til fótanna og forði sér í nærliggjandi skotgrafir stjórnmálaflokkanna. Þá reynir á almenning að leyfa því ekki að gerast.
Athugasemdir (5)
-
Pétur Örn Björnsson skrifar:
\"...er hætt við að að þeir (þingmennirnir) taki til fótanna og forði sér í nærliggjandi skotgrafir stjórnmálaflokkanna. Þá reynir á almenning að leyfa því ekki að gerast.\"
Mjög vel og skynsamlega skrifað. Hér verður -án allrar Þórðargleði- að fara fram heiðarlegt og réttlátt uppgjör. Það verður vafalaust mörgum erfitt.
Það er hins vegar lágmarkskrafa frá almenningi að þingmenn sýni þann manndóm og siðferði að leggjast ekki í skítlegar skotgrafir flokka sinna.
Aðeins sannleikurinn, umbúðalaus, já, aðeins allur sannleikurinn, mun að lokum gera þjóðina frjálsa og þá fyrst geta sekir beðist fyrirgefningar.
Og íslensk þjóð hefur aldrei verið refsiglöð og fyrirgefur flest, ef menn tala einungis tungu sannleikans, en það er líka skýlaus krafa almennings. -
Jónsi skrifar:
Það er ekkert réttlæti í þessu þjóðfélagi.
Valdaklíkan gerir eins og henni sýnist og gefur skít í lög og rétt.
Siðleysið er algjört.
Sjá:
http://www.visir.is/article/20100313/FRETTIR01/522489779
http://www.bb.is/?PageID\=26&NewsID\=145739 -
Siggi skrifar:
Hún er nú komin í prentun skýrslugreyið og þykir ekki merkileg. Starfsmenn Odda gráta þurrum tárum og glotta við tönn. Þeir eru kannski ekki eins viðkvæmir og silkihúfur sannleiksnefndarinnar sem voru að brotna saman hvað eftir annað. Og einn hrunverjinn segir að þetta sé ekki neitt neitt sem þarna komi fram. Svo dagsetning skiptir ekki máli og sennilega verður alveg óþarfi að skríða í skotgrafirnar. Þetta er líklega alveg tannlaust hvort sem er.
-
Jóhanna skrifar:
Það verður enginn umbúðalaus sannleikur í þessari skýrslu.
Hverjum dettur það eiginlega í hug!
Þetta verður löng og leiðinleg stjórnsýsluskýrsla á stofnanamáli, þar sem ómögulegt verður að finna kjarnann.
Og líklega verður alls ekki tekið á því sem mestu skiptir, sem er siðleysi og fyrirlitning stjórnmálamanna á þeim lýðræðisreglum sem þeir segjast starfa eftir.
-
stefan benediktsson skrifar:
Ég held að sjaldan hafi nokkur hópur fólks fengið annað eins tækifæri. Ef þau fara í skotgrafirnar verður það grafskrift íslenskra stjórnmála. Ef þeim tekst að taka þetta verkerfni á næsta vinnslustig gætu stjórnmál átt von á Íslandi.
Skrifa athugasemd